ویب ڈیسک: فلسطینیوں کی نسل کشی کرنے کیلئے عالمی فوجداری عدالت  کی جانب سے جنگی مجرم ٹھہرائے گئے اسرائیلی وزیرِ اعظم بنجامن نیتن یاہو کو گرفتار کرنے کے حوالے سے نیویار ک کے  مئیر  ظہران ممدانی کے بیان پر اقوامِ متحدہ میں اسرائیل کے سفیر ڈینی ڈینن نے ایکس پر ایک پوسٹ میں ممدانی پر اپنی میئر کی ذمہ داریوں پر توجہ مرکوز کرنے کے بجائے دشمنی بھڑکانے اور سرخیاں بٹورنے کا الزام لگاتے ہوئے کہا ہے کہ اگر کسی کو گرفتار کیا جانا چاہئے تو وہ خود ممدانی ہیں۔
ذرائع ابلاغ کی رپورٹ کے مطابق نیویارک شہر کے میئر ظہران ممدانی اس بات کا جائزہ لے رہے ہیں کہ آیا ان کے پاس ستمبر میں اقوامِ متحدہ کی جنرل اسمبلی کے آئندہ اجلاس دوران، محصور علاقے غزہ میں فلسطینیوں کی نسل کشی کرنے کیلئے عالمی فوجداری عدالت  کی جانب سے جنگی مجرم ٹھہرائے گئے اسرائیلی وزیرِ اعظم بنجامن نیتن یاہو کو گرفتار کرنے کا قانونی اختیار ہے یا نہیں۔ ممدانی کے اس اعلان پر اسرائیلی خیمے کی طرف سے شدید ردِعمل سامنے آیا ہے۔

 ایک انٹرویو میں ممدانی نے ’دی نیویارک ٹائمز‘ کو بتایا کہ ان کا ماننا ہے کہ وزیرِ اعظم نیتن یاہو کو ’دی ہیگ‘ (نیدرلینڈز کا شہر جہاں آئی سی سی کا صدر دفتر ہے) میں ہونا چاہئے۔ انہوں نے کہا کہ ” نیتن یاہو جنگی مجرم ہیں جن پر آئی سی سی کی طرف سے فردِ جرم عائد کی گئی ہے۔ ممدانی نے اعتراف کیا کہ وہ یقین سے نہیں کہہ سکتے کہ آیا انکے پاس نیویارک پولیس ڈیپارٹمنٹ  کو کسی غیر ملکی لیڈر کو حراست میں لینے کا حکم دینے کا اختیار ہے، لیکن وہ شہر کی قانونی ٹیم کے ساتھ اس معاملے پر سرگرمی سے بات  چیت کر رہے ہیں۔ انہوں نے کہا کہ ”نیویارک شہر میں قانون مجھے جو بھی کرنے کی اجازت دے گا، ہم وہی کریں گے۔

واضح رہے  عالمی فوجداری عدالت (آئی سی سی )نے 2024 میں جاری کردہ ایک وارنٹ میں کہا تھا کہ اس کے پاس اس بات پر یقین کرنے کیلئے معقول وجوہات ہیں کہ 7 اکتوبر2023 کے حماس کے حملے کے بعد غزہ میں اسرائیل کی فوجی جارحیت سے متعلق مبینہ جنگی جرائم اور انسانیت کے خلاف جرائم کیلئے نیتن یاہو ذمہ دار ہیں۔ ممدانی  جو اس سے قبل بھی اسرائیل کو ” نسل پرست حکومت“قرار دے چکے ہیں، ماضی میں یہ عہد کر چکے ہیں کہ وہ عدالت کو مطلوب نیتن یاہو اور روسی صدر ولادیمیر پیوٹن کے خلاف آئی سی سی کے گرفتاری کے وارنٹ نافذ کرنے کیلئےپولیس کو بھیجیں گے۔ واضح رہے کہ اقوامِ متحدہ کے نیویارک میں واقع صدر دفتر میں ستمبر میں جنرل اسمبلی کا اجلاس منعقد ہوگا جس میں بڑی تعداد میں عالمی لیڈران شرکت کریں گے۔ 

اقوامِ متحدہ میں اسرائیل کے سفیر ڈینی ڈینن نے ممدانی کے بیان پر ردعمل ظاہر کرتے ہوئےایک پوسٹ میں انہوں نے ممدانی پر اپنی میئر کی ذمہ داریوں پر توجہ مرکوز کرنے کے بجائے دشمنی بھڑکانے اور سرخیاں بٹورنے کا الزام لگایا۔ ڈینن نے لکھا کہ ”اسرائیلی وزیرِ اعظم نیتن یاہو نیویارک آئیں گے،فخر کے ساتھ اقوامِ متحدہ کی جنرل اسمبلی سے خطاب کریں گے اور دنیا کے سامنے کھڑے ہو کر اسرائیل کا سچ بیان کریں گے۔ انہوں نے مزید کہا کہ اگر کسی کو گرفتار کیا جانا چاہئے تو وہ خود ممدانی ہیں۔ واضح رہے کہ اس سے قبل، نیتن یاہو نے ممدانی پر حماس کی حمایت کا الزام لگاتے ہوئے نیویارک کے ایک ریڈیو شو میں کہا تھا کہ ”میرا خیال ہے کہ ممدانی خفیہ طور پر امریکہ سے نفرت کرتے ہیں۔