ویب ڈیسک: مقبول سوشل میڈیا ایپ ٹک ٹاک نے خاموشی سے بہت بڑی تبدیلی کر دی ہے جس کا علم متعدد افراد کو نہیں ہو سکا۔

ہو سکتا ہے کہ آپ کو بھی ٹک ٹاک استعمال کرتے ہوئے ایپ میں کچھ تبدیلی محسوس ہوئی ہو مگر یہ سمجھ نہ آیا ہو کہ یہ تبدیلی کیا ہے۔تو جان لیں کہ ٹک ٹاک نے اپنا فونٹ تبدیل کر لیا ہے۔جی ہاں واقعی سوشل میڈیا پلیٹ فارم نے اپنا کاسٹیوم فونٹ TikTok Sans متعارف کرایا ہے۔کمپنی کے مطابق یہ فونٹ متعدد زبانوں کو سپورٹ کرتا ہے اور اس سے تحریر زیادہ واضح اور خوش خط ہو جائے گی۔ ٹک ٹاک نے ایک بلاگ پوسٹ میں بتایا کہ اس فونٹ میں الفاظ زیادہ بڑے اور نمایاں ہوتے ہیں جس سے تحریر کو پڑھنے میں مدد ملتی ہے۔

یہ فونٹ فی الحال انگلش، پرتگیز، جرمن، ترک، ویتنامی، انڈونیشین، فرنچ اور ہسپانوی زبانوں میں استعمال کیا جائے گا مگر مستقبل قریب میں دیگر زبانوں کے لیے بھی اسے اپنایا جائے گا۔اپنا فونٹ ڈیزائن کرکے ٹک ٹاک بھی ان ٹیکنالوجی کمپنیوں کی فہرست میں شامل ہوگیا ہے جو ماضی میں ایسا کر چکی ہیں۔ایپل نے سان فرانسسکو فونٹ تیار کیا جبکہ گوگل، نیٹ فلکس اور انسٹاگرام کے بھی اپنے فونٹس ہیں۔ ٹک ٹاک نے بتایا کہ یہ فونٹ ہمارے پلیٹ فارم کی شخصیت کا عکاس ہے۔کمپنی کے مطابق یہ فونٹ دنیا بھر میں متعارف کرایا جا چکا ہے تو آپ کی ایپ میں یہ تبدیلی اب تک آچکی ہوگی۔