محمد اسلم: روجھان کے کچہ عمرانی، سکھانی اور کچہ کراچی کے علاقوں میں پولیس کا ڈاکوؤں کے خلاف بڑا آپریشن جاری ہے، پولیس نے جدید ٹیکنالوجی کا استعمال کرتے ہوئے ڈاکوؤں کے ٹھکانوں کو نشانہ بنایا، جس کے بعد 11 ڈاکوؤں نے خوف کے مارے پولیس کے سامنے سرنڈر کردیا۔

ڈی پی او راجن پور محمد عمران کے مطابق آپریشن کے دوران ڈاکوؤں کے ٹھکانوں پر ڈرون کے ذریعے گولا باری کی گئی جس کے نتیجے میں انتہائی مطلوب عمرانی گینگ کے 11 ڈاکوؤں نے خوف کے باعث پولیس کے سامنے ہتھیار ڈال دیے۔ انہوں نے بتایا کہ سرنڈر کرنے والے ڈاکو بھاری اسلحے سمیت پولیس تحویل میں لے لیے گئے ہیں۔ یہ ڈاکو اغوا، قتل اور ڈکیتی کے درجنوں مقدمات میں مطلوب تھے۔

پولیس کا کہنا ہے کہ گرفتار ڈاکوؤں کو قانون کے مطابق سزا دی جائے گی جبکہ ڈاکوؤں کے ٹھکانے اور بنکرز تباہ کر دیے گئے ہیں۔ مزید ڈاکوؤں کو گرفتاری دینے کی وارننگ دی گئی ہے، پولیس اور ڈاکوؤں کے درمیان فائرنگ کا تبادلہ تاحال جاری ہے۔