سٹی 42 : پنجاب کی وزیراعلیٰ مریم نواز نے سٹوڈنٹس کو اگلے سال ایک لاکھ الیکٹرک بائیکس، ایک لاکھ لیپ ٹاپ اور ایک لاکھ سکالر شپ دینے کا اعلان کردیا۔ 

وزیراعلیٰ مریم نواز نے لودھراں میں ہونہار سکالر شپ اور لیپ ٹاپ سکیم کی تقریب سے خطاب کے دوران بڑے اعلانات کردیے، جن میں 2026 ،یوتھ کا سال قرار دینے، طلبہ کواگلے سال ایک لاکھ الیکٹرک بائیکس دینے، پورے پنجاب میں آئی ٹی سٹیز بنانے، آرٹی فیشل انٹیلی جنس کا سنٹر لاہور میں بنانے، اگلے سال سے ایک لاکھ لیپ ٹاپ اور ایک لاکھ سکالر شپ دینے، سکلڈ نوجوانوں کے لئے پرواز کارڈ متعارف کرانے کا اعلان شامل ہے۔ 

مریم نواز شریف نے اپنے خطاب میں کہا کہ سپر ہیروز میرے پیارے بچوں اور بچیوں کو سلام پیش کرتی ہوں۔ انہوں نے کہا کہ لیپ ٹاپ اور ہونہار سکالر شپ سکیم پر وزیر تعلیم رانا سکندر حیات کو مبارکباد اور شاباش دیتی ہوں، لیپ ٹاپ اور سکالر شپ حاصل کرنے والے تمام طلبہ و طالبات کو مبارکباد اور شاباش دیتی ہوں۔ بچوں نے محنت کرکے اپنے، والدین اور میرے خواب پورے کیے، بچوں کو سکالر شپ، ہونہار سکالر شپ اور لیپ ٹاپ دے رہے ہیں، ان سکیموں سے بھی بڑھ کرمزید اپنے بچوں کے لئے بہت کچھ کریں گے۔  

وزیراعلیٰ مریم نواز نے کہا کہ لیپ ٹاپ کی تقریب بڑے شہرکی بجائے لودھراں منعقد کرکے ثابت کیا کہ میرے دل میں شہروں کی کوئی تفریق نہیں، راولپنڈی، لاہور، ملتان، لیہ، بھکر، ساہیوال کی وزیرا علیٰ بھی ہوں سب میرے لیے برابر ہیں، تمام بچوں سے اس پلیٹ فارم سے وعدے کرتی ہوں آپ تمام خوابوں کو حقیقت کا رنگ دیا جائے گا۔ انہوں نے کہا کہ سکالر شپ اور لیپ ٹاپ سکیم اگر پانچ سال پہلے شروع ہوتا کتنے بچے اس سے مستفید ہوتے۔ 

2026 تمام طلبہ و طالبات کے لئے بڑے بڑے پیکچز متعارف کرانے جارہے ہیں، پنجاب میں صرف اعلانات نہیں کیے بلکہ پراجیکٹ شروع کیے ہیں۔ اپنی چھت، اپناگھر سکیم سے ایک لاکھ 25 ہزار گھر بن رہے ہیں، 50ہزار بن چکے،70ہزار سے زائد گھر بن رہے ہیں۔ انہوں نے کہا کہ جن کے پاس پلاٹ نہیں ان کو اپنی زمین، اپنا گھر سکیم سے تین مرلہ کا پلاٹ دینے جارہے ہیں۔ 

مریم نواز نے کہا کہ پورے صوبے کو یکساں طور پر ستھرا پنجاب کے اہلکار صاف کررہے ہیں، پورے صوبے کے تمام شہر اور دیہات تک کو صاف ستھرا بنایا جارہا ہے۔ انہوں نے کہا کہ پورے پنجاب میں لاء اینڈ آرڈر میں کی صورتحال کنٹرول میں ہے، مخالفین بھی پنجاب کی کارکردگی اور سی سی ڈی کی تعریف کرتے ہیں، اپنی ماں، بہنوں اور بیٹیوں کی عزت کا پوری طرح خیال ہے، بیٹی گھر سے پڑھی، بازار یا نوکری کے لئے  نکلے تو گھر والوں کو کوئی فکر نہ ہو۔ پورے صوبے میں جہاں بھی ہراسمنٹ کا واقعہ پذیر ہوتے ہی ایکشن لیا جاتا ہے۔ 

وزیراعلیٰ پنجاب نے کہا کہ لاء آرڈر کی صورتحال مرد چیف منسٹر نہیں کرسکے، وہ آپ کی بیٹی نے کر دکھایا، والدین سے اپیل کرتی ہوں کہ بیٹیوں جو بھی کرنا چاہتی ہوں ان کو سپورٹ کریں۔ انہوں نے کہا کہ گوجرانوالہ، فیصل آباد میں میٹرو بس بنانے جارہے ہیں، پورے پنجاب میں الیکٹروبس چل رہی اور بچیوں کے تحفظ کے لئے سی سی ٹی وی سے مانیٹر کیا جارہا ہے۔  

مریم نواز شریف نے کہا کہ 8لاکھ سے زائد کسانوں کو کسان کارڈ دیئے ہیں، کسانوں کو فصل کے اخراجات کے لئے ڈیڑھ لاکھ روپے بلاسود دیتے ہیں۔ انہوں نے کہاکہ 
پچھلے دور حکومت میں سموگ کی وجہ سے سکول، بازار کو بند کرنا پڑا اب کچھ بند نہیں ہوگا۔ پہلا کینسر سرکاری ہسپتال، اور پورے پنجاب میں دل کے ہسپتال بن رہے ہیں۔ 
کلینک آن ویل اور فیلڈ ہسپتال سے لوگوں کی دہلیز پر جاکر علاج کیا جارہا ہے، پورے صوبے کے تمام سرکاری ہسپتالوں میں مفت ادویات دی جارہی ہے۔ 

انہوں نے مزید کہا کہ مساجد سے اعلانات ہوتے ہی زمینوں پر قبضہ مافیا کے خلاف کارروائی کی جارہی ہے،  پنجاب اب  تمام مافیا سے فری ہے، پورے پنجاب میں ڈرگز مافیا کا خاتمہ کر دیا ہے، پورے صوبے میں چائے کافی کی طرح ڈرگز بیچی جارہی تھی۔ مریم نواز نے کہا کہ 30ہزار سے زائد کلومیٹر روڈز کو دوسال میں مکمل کریں گے۔ پچھلے چند دنوں کے اندر 22 لاکھ لائسنس بنائے گئے ہیں، چھوٹی عمر کے بچوں کی ڈرائیونگ سے حادثات بڑھ رہے تھے۔

وزیراعلیٰ پنجاب نے کہا کہ قبضہ مافیا اور بازاروں سے تجاوزات کا خاتمہ کیا جارہا ہے، وی وی آئی پی اور ڈالہ کلچر کا پورے پنجاب سے خاتمہ کر دیا ہے۔ انہوں نے کہا کہ حلفاً کہتی ہوں کہ 80ہزار سے زائد بچوں کو سکالر شپ دیئے، کوئی نہیں کہہ سکتا کسی ایک بچے کو کسی سفارش پر ہونہار سکالر شپ یا لیپ ٹاپ دیا گیا ہے، محنت کرنے والے بچہ کا احساس ہے اس لیے سفارش کے بغیر سکالر شپ دے رہے، بچے یا بچیاں وسائل کی کمی کی وجہ سے تعلیم حاصل نہ کرسکیں تو یہ حکومت کی ناکامی ہوگی۔ 

مریم نواز نے کہا کہ پورے پنجاب کے اندر آئی ٹی سٹی بنانے جارہے ہیں، بچوں کو ان اداروں کے اندر ٹریننگ کے بعد کاروبار سٹارپ اپ بھی دیں گے، اگلے سال پانچ لاکھ بچوں کو سکلز ٹریننگ دیں گے، سکلڈ بچوں کو روزگار کے مواقع اور بیرون ملک جانے کے لئے سہولتیں دیں گے۔ پنجاب پولیس کو بہتر بنارہے ہیں۔ انہوں نے کہا کہ کہتے کہ پنجاب کے پاس بہت زیادہ پیسے ہے سب کے پاس ہیں پنجاب اپنے عوام پر خرچ کرتا ہے، دیگر صوبوں کی طرح پنجاب کے پاس بھی این ایف سی ایوارڈسے پیسے ملتے ہیں۔ 

وزیراعلیٰ مریم نواز نے کہا کہ جتنا بھی پیسے ملتا ہے، وہ سب پہلی بار پنجاب کے عوام پر لگ رہا ہے، دیگر صوبے سے آنے والے افراد کو بھی پنجاب روزگار اور صحت کی سہولیات فراہم کرتا ہے۔ انہوں نے کہا کہ اڈیالہ جیل اور پرٹوکول سے فرصت  ملے تو دیکھیں عوام رل  گئے اور ہسپتال اور روڈز کھنڈرات بن گئے۔ فتنہ، انتشار، پولیس اور رینجرز والے کو مارنے کا بیانیہ نہیں چلے گا۔ بیانیہ، بیانہ کا کھیل ختم ہوگیا ہے پاکستان میں اب پرفارم کرنا ہوگا۔ بیانیہ بیانہ کا کھیل کھیلنے والے پاکستان کو ڈبا دیا تھا۔ 

انہوں نے مزید کہا کہ لوگوں کو ریلیف دینے کے لئے کام کرنا پڑتا ہے۔ اب بیانیہ کا نہیں بلکہ خدمت اور پراجیکٹ لانچ کرنے سے پاکستان ترقی کرے گا، بیرون ملک جانے والے ہنر مند افراد کی پرواز کارڈ کے ذریعے مدد کی جائے گی۔ مریم نواز نے کہا کہ میرے آپ سے وعدہ ہے کہ حکومت پنجاب سے جو ہوسکا طلبہ اور نوجوانوں کے لئے کرے گی۔ طلبہ وعدے کریں کہ دھرتی ماں کے خلاف کسی سازش کا حصہ نہیں بنیں گے اور آنچ نہیں آنے دیں گے۔