شعیب مختار :وفاقی وزیر صحت مصطفیٰ کمال نے کراچی میں دوسرے ڈیجیٹل ہیلتھ سینٹر کا افتتاح کر دیا۔
 ٹیلی میڈیسن کے ذریعے بیرونِ ملک ڈاکٹر مریضوں کا معائنہ کریں گے جبکہ مفت ادویات بھی فراہم کی جائیں گی۔ 
 جیکب لائن میں ڈیجیٹل ہیلتھ سینٹرکی افتتاحی تقریب سے خطاب میں مصطفیٰ کمال نے کہا کہ اب مریضوں کا علاج جدید ٹیلی میڈیسن کے ذریعے ممکن ہو سکے گا، بیرون ملک ڈاکٹر بھی مریض کا لائیو ویڈیو کال کے ذریعے معائنہ کر سکیں گے۔
وفاقی وزیر صحت نے نشاندہی کی کہ شہر کے بڑے سرکاری ہسپتالوں میں تقریباً 70 فیصد مریض معمولی نوعیت کے ہوتے ہیں جس کے باعث سنگین مریضوں کو بروقت علاج میں مشکلات پیش آتی ہیں، ڈیجیٹلائزڈ بی ایچ یوز اس دباؤ کو کم کرنے میں مؤثر کردار ادا کر سکتے ہیں۔

مصطفیٰ کمال کا کہنا تھا کہ پاکستان مریض بنانے کی صنعت بن چکا ہے، صرف ہسپتال بنانا ہیلتھ کیئر سسٹم نہیں بلکہ اصل توجہ بیماریوں سے بچاؤ پر ہونی چاہیے۔