طاہر جمیل:  وزیراعلیٰ پنجاب کے ویژن کے تحت لاہور کو پولیو فری بنانے کے مشن پر عملدرآمد تیزی سے جاری ہے۔

 ڈپٹی کمشنر سید موسیٰ رضا کی زیرِ صدارت انسدادِ پولیو مہم کے اہداف کا جائزہ اجلاس منعقد ہوا، جس میں ایڈیشنل ڈپٹی کمشنر جنرل، سی ای او ہیلتھ ڈاکٹر آصف ارباب، اسسٹنٹ کمشنرز اور عالمی ادارہ صحت کے مبصرین نے شرکت کی۔

اجلاس میں بریفنگ کے دوران بتایا گیا کہ مہم کے تیسرے روز تک لاہور بھر میں خصوصی ٹیمیں فعال ہیں اور گھر گھر جا کر بچوں کو پولیو کے قطرے پلائے جا رہے ہیں۔ ابتدائی تین دنوں میں 94 فیصد سے زائد ہدف حاصل کر لیا گیا، جبکہ قطرے نہ پینے والے 46 ہزار سے زائد بچوں کو بھی کامیابی سے ویکسین دی گئی۔

عالمی ادارہ صحت کے مبصرین نے مہم کی کارکردگی پر اطمینان کا اظہار کیا۔
ڈپٹی کمشنر سید موسیٰ رضا نے ہدایت دی کہ تمام اسسٹنٹ کمشنرز فیلڈ مانیٹرنگ کو مزید مؤثر بنائیں اور پولیو ٹیموں کو مکمل سکیورٹی فراہم کی جائے۔ انہوں نے واضح کیا کہ کوئی بچہ ویکسین سے محروم نہ رہے اور مہم کے تمام اہداف مقررہ مدت میں مکمل کیے جائیں، کوتاہی ہرگز برداشت نہیں کی جائے گی۔