ویب ڈیسک : شہرِ قائد کے کینٹ ریلوے اسٹیشن کے مسافروں کو کئی جدید سہولتیں فراہم کر دی گئیں۔

کراچی کے کینٹ اسٹیشن میں مسافروں کی سہولت کے لیے سی آئی پی لاؤنجز اور خودکار سیڑھیوں، فری وائی فائی سمیت دیگر کئی جدید سہولتیں فراہم کر دی گئیں۔

وزیر ریلوے حنیف عباسی نے کینٹ اسٹیشن کا دورہ کیا اور وہاں مسافروں کو فراہم کی جانے والی جدید سہولتوں کا جائزہ لیا۔ اس موقع پر میڈیا سے گفتگو کرتے ہوئے انہوں نے کہا کہ کراچی سے بہت مطالبہ تھا کہ یہاں کام کیا جائے۔ اب ہم نے لاہوراسٹیشن سے زیادہ بڑا اسٹیشن کراچی میں تبدیل کیا ہے۔ سی آئی پی لاؤنج کے ساتھ اکانومی اور فیملی ایریا بھی بنایا گیا ہے۔

حنیف عباسی نے کہا کہ ملک کا ہی نہیں بلکہ کراچی پاکستان ریلویز کا بھی حب ہے۔ ورلڈ کلاس ٹرین تیار کی ہے، جس میں فری وائی فائی کی سہولت دستاب ہوگی۔ انہوں نے بتایا کہ محکمہ ریلویز میں سات سے 8 میں بہت کام کیا گیا ہے۔ ایشین ڈیولپمنٹ بینک کے تعاون سے ریلوے ٹریکس پر کام کیا جا رہا ہے۔ انہیں بننے میں 4 سے 5 سال لگیں گے۔