سٹی42: پنجاب کے 27 اضلاع میں پنک اور بلیو موبائل لائسنسنگ یونٹس فعال کر دیے گئے ہیں، جن کے ذریعے شہریوں کو گھر کی دہلیز پر ڈرائیونگ لائسنس کی سہولت فراہم کی جا رہی ہے۔ ترجمان کے مطابق گزشتہ دو ماہ کے دوران ایک لاکھ 40 ہزار سے زائد شہریوں نے اون ڈور موبائل لائسنسنگ سروس سے فائدہ اٹھایا۔
اعداد و شمار کے مطابق 51 ہزار شہریوں نے لرننگ لائسنس حاصل کیے، 70 ہزار افراد نے موبائل یونٹس کے ذریعے فریش ریگولر ڈرائیونگ لائسنس بنوائے جبکہ 25 ہزار شہریوں نے اپنے لائسنس کی تجدید کروائی۔ ترجمان کا کہنا ہے کہ یہ اقدامات وزیر اعلیٰ پنجاب کے ویژن کے تحت عوامی سہولت اور خواتین کو بااختیار بنانے کی عملی مثال ہیں۔
خواتین کے لیے خصوصی پنک موبائل لائسنسنگ یونٹس لاہور، راولپنڈی، گوجرانوالہ، فیصل آباد، سیالکوٹ اور ملتان میں فعال ہیں، جہاں اب تک 24 ہزار خواتین کو لائسنسنگ کی سہولت فراہم کی جا چکی ہے۔ پنک یونٹس کے ذریعے 7 ہزار خواتین نے لرننگ لائسنس جبکہ 6 ہزار نے ریگولر ڈرائیونگ لائسنس حاصل کیے۔