سٹی42: حماس نے غزہ میں چھ ہفتے کی جنگ بندی کی اسرائیلی تجویز کو مسترد کر دیا ہے جس میں مسلح گروپ سے ہتھیار چھوڑنے کا مطالبہ کیا گیا تھا۔ بی بی سی نے بتایا کہ اس کے رپورٹر کو  اسرائیل اور حماس کے مذاکرات سے واقف ایک سینئر فلسطینی اہلکار نے کہا کہ اسرائیل کے منصوبے میں جنگ کے خاتمے یا اسرائیلی فوجیوں کے انخلا کا کوئی وعدہ نہیں دیا گیا -

جنگ بندی کی تجویز حماس کی طرف سے مسترد کئے جانے سے غزہ کے اندر عام بے گھر فلسطینیوں کے لئے صورتحال  مزید پیچیدہ ہونے کا خدشہ ہے اور اسرائیل کے اندر یرغمالیوں کی رہائی کے منتظر عوام کے لئے یہ مزید تشویش کا باعث ہے جہاں حماس کی پھیلائی ہوئی یہ افواہ بھی گردش کر رہی ہے کہ غزہ کی کسی سرنگ میں قید ایک یرغمالی  کے  ساتھ موجود حماس کے مسلح کارکنوں سے حماس کا رابطہ اس لئے منقطع ہو گیا کہ اسرائیل نے اس سرنگ کے علاقہ پر فضائی حملہ کیا ہے۔

اقوام متحدہ کی ایک ایجنسی نے خبردار کیا ہے کہ "غزہ میں انسانی صورتحال اب  7 اکتوبر 2023 کو غزہ جنگ کے آغاز کے بعد سے 18 مہینوں میں بدترین ہو چکی ہے"۔

چھ ہفتے ہو چکے ہیں جب سے اسرائیل نے کسی بھی سامان کو کراسنگ کے ذریعے فلسطینی سرزمین میں داخل ہونے کی اجازت نہیں دی - یہ اب تک کا سب سے طویل امبارگو ہے۔

اقوام متحدہ کی ایجنسیوں نے اسرائیل کے اس بیان کی تردید کی  کہ غزہ میں طویل عرصے تک رہنے کے لیے خوراک موجود ہے۔ اقوام متحدہ کی ایجنیسوں کا کہنا ہے کہ حالیہ ناکہ بندی  بین الاقوامی انسانی قانون کی خلاف ورزی میں بدل سکتی ہے۔

اسرائیل کے وزیر اعظم نے کہا کہ سپلائی پر روک لگانے کا مقصد حماس پر دباؤ ڈالنا تھا کہ وہ یرغمالیوں کو رہا کرے اور جنگ بندی میں توسیع کرے جو یکم مارچ کو ختم ہو گئی تھی۔

حماس ہتھیار چھوڑ دے؛ اسرائیل کی جنگ بندی کی تجویز 

اسرائیل نے گزشتہ ہفتے کے آخر میں علاقائی ثالثوں کو جنگ بندی کی نئی تجویز پیش کی تھی، جب وزیر اعظم بنجمن نیتن یاہو نے واشنگٹن میں امریکی صدر ڈونلڈ ٹرمپ سے ملاقات کی تھی۔

اس کے بعد حماس کے وفد نے چیف مذاکرات کار خلیل الحیا کی سربراہی میں قاہرہ میں مصری انٹیلی جنس حکام سے ملاقات کی۔

بی بی سی نے آج رپورٹ کیا کہ ایک سینیئر فلسطینی اہلکار نے بی بی سی کو بتایا: "اسرائیلی تجویز مصر کے ذریعے پیش کی گئی تھی جس میں واضح طور پر حماس کو غیر مسلح کرنے کا مطالبہ کیا گیا تھا۔ اس تجویز میں جنگ کے خاتمے یا غزہ سے دستبرداری کے لیے کسی اسرائیلی وعدے ک کا ذکر نہیں ہے۔ اس لیے حماس نے اس پیشکش کو مکمل طور پر مسترد کر دیا ہے۔"

یہ پہلی بار سمجھا جا رہا ہے کہ اسرائیل نے حماس کے اسلحہ چھوڑنے کو جنگ بندی کو آگے بڑھانے کی شرط کے طور پر شامل کیا ہے - یہ  مطالبہ اس مسلھ گروپ کے لیے ایک سرخ لکیر ہے اور اس کی قید مین اب تک اسرائیل کے  59 شہری ہیں جن مین سے بیشتر مر چکے ہیں لیکن حماس باقی زندہ (24 یرغمالیوں) اور مر چکے یرغمالیوں کو بارگیننگ چِپ کے طور پر استعمال کر رہی ہے اور اسرائیل غزہ کی ناکہ بندی اور اپنے تئیں ٹارگٹڈ ائیر سٹرائیکس اور زمینی آپریشنز کو حماس کو توڑنے اور منتشر کرنے کے لئے استعمال کر رہا ہے۔ اس منطر نامے میں بے گھر غزن اور اسرائیل کے یرغمالیوں کے متعلقین مسلسل دو طرفہ اذیتناک مصائب کا شکار ہیں۔

فلسطینی اہلکار نے اسرائیل پر الزام لگایا کہ وہ یرغمالیوں کی رہائی تو چاہتا ہے لیکن جنگ کو بھی طول دینے کے لیے رک رہا ہے۔

اسرائیلی امریکی یرغمالی کے متعلقحماس کا  تشویش ناک بیان

منگل کی سہ پہر، حماس  کے ترجمان نے کہا کہ اس کا اسرائیلی-امریکی یرغمال ایڈن الیگزینڈر کو یرغمال بنا کر ایک سرنگ میں رکھنے والے جنگجوؤں کے ایک گروپ سے "رابطہ منقطع" ہو گیا ہے۔ حماس کے ترجمان نے دعویٰ کیا کہ اس جگہ پر اسرائیل نے براہ راست حملہ کیا تھا۔

ابو عبیدہ نے دعویٰ کی تائید کے لیے کوئی ثبوت پیش نہیں کیا اور نہ ہی اس بات کا کوئی اشارہ دیا کہ کب رابطہ منقطع ہوا۔ اسرائیل نے کہا ہے کہ وہ ان مقامات کو نشانہ بنانے سے گریز کرتا ہے جہاں اس کا خیال ہے کہ یرغمال بنائے  لوگوں کو حماس چھپاتی ہے۔

حماس نے ہفتے کے روز اس  21 سالہ فوجی کی ایک پروپیگنڈا ویڈیو جاری کی تھی، جس میں وہ اسرائیلی حکومت کو تنقید کا نشانہ بناتے ہوئے دباؤ میں بولتا دکھائی دیا تھا۔

ٹائمز آف اسرائیل کی رپورٹ

ٹائمز آف اسرائیل نے بھی حماس کے ساتھ اسرائیل کے مذاکرات  کے متعلق رپورٹ میں ڈیڈ لاک جیسی صورتحال کی نشان دہی کی۔ آج پبلش کی گئی رپورٹ مین ٹائز آف اسرائیل نے بتایا کہ طویل عرصے سے تعطل کا شکار اسرائیل اور حماس کے یرغمالی مذاکرات میں کوئی پیش رفت دکھائی نہیں دے رہی ہے۔

 ایک عرب ثالثی کرنے والے ملک کے ایک اہلکار نے بتایا کہ متعدد رپورٹس کے درمیان یہ دعویٰ کیا گیا ہے کہ مذاکرات میں اضافی پیش رفت ہوئی ہے۔ عرب عہدے دار نے کہا کہ "ایک ممکنہ پیش رفت کے بارے میں خاص طور پر اسرائیل کی طرف سے بہت شور مچایا جا رہا ہے، لیکن وہی عناصر جو اب تک کسی معاہدے کو روکتے رہے ہیں، اب بھی موجود ہیں۔"

یہ نوٹ کرنا اہم ہے کہ حالیہ ہفتوں میں حماس نے ہی عبوری جنگ بندی کے معاہدے کو مسترد کیا ہے، وہ اب بھی اس بات پر اصرار کر رہی ہے کہ غزہ میں مستقل جنگ بندی میں کے لیے ایسے عارضی معاہدے کے لیے  اسرائیل کے متقبل میں غزہ سے انخلا کے لئے مضبوط یقین دہانیاں کرائی جائیں - جسے اسرائیل اس وقت تک قبول نہیں کرے گا جب تک کہ حماس اس پٹی کی حکومت اور سیکیورٹی کنٹرول سے دستبردار نہ ہو جائے، عرب اہلکار نے وضاحت کی۔

عرب عہدیدار نے مزید کہا کہ حماس مکمل ہتھیار ڈالنے پر راضی نہیں ہوگی لیکن اسرائیل اب بھی یہی مطالبہ کر رہا ہے۔

حماس نے پیر کو دیر گئے ایک بیان میں کہا کہ وہ اسرائیل کی ایک نئی تجویز کا مطالعہ کر رہی ہے اور وہ "جلد سے جلد" اپنا ردعمل پیش کرے گی۔

دہشت گرد گروپ نے اپنے بنیادی مطالبے کا اعادہ کیا کہ جنگ بندی کے معاہدے سے غزہ میں جنگ کا خاتمہ ہونا چاہیے اور پٹی سے مکمل اسرائیلی انخلاء حاصل کرنا چاہیے۔

اس سے پہلے حماس کے سینئر عہدیدار سامی ابو زہری نے رائٹرز  نیوز ایجنسی کو بتایا کہ یہ تجویز گروپ کے اس مطالبے کو پورا نہیں کرتی ہے کہ اسرائیل دشمنی کو مکمل طور پر روکنے کا عہد کرے۔

ابو زہری نے کہا کہ اس تجویز میں اسرائیل نے حماس کو غیر مسلح کرنے کا مطالبہ کیا، جس سے یہ گروپ اتفاق نہیں کرے گا۔

ابو زہری نے کہا کہ "مزاحمت کے ہتھیاروں کو حوالے کرنا ایک  ریڈ لائن ہے اور یہ زیر غور نہیں ہے، بات چیت کو چھوڑ دیں۔"

حماس نے طویل عرصے سے تخفیف اسلحہ کی بات کو مسترد کر دیا ہے، حالانکہ اس کے عہدیداروں نے پٹی کے کنٹرول کو آزاد ٹیکنو کریٹس کی ایک عبوری باڈی کے حوالے کرنے پر آمادگی ظاہر کی  تھی، جیسا کہ غزہ کی جنگ کے بعد کی تعمیر نو کے لیے مصری منصوبے میں تصور کیا گیا تھا جس کی نقاب کشائی گزشتہ ماہ ہوئی تھی۔

"حماس جنگ کے خاتمے اور غزہ سے اسرائیلی فوج کے انخلاء کے بدلے میں یرغمالیوں کو ایک ہی بار حوالے کرنے کے لیے تیار ہے"، ابو زہری نے اس بات کی تصدیق کرتے ہوئے کہا  جو حماس کے ایک سینئر عہدیدار نے اس ماہ کے شروع میں دی ٹائمز آف اسرائیل کو بتائی تھی۔

یہ واضح نہیں ہے کہ آیا اسرائیل کی تازہ ترین تجویز جس کا حماس نے کہا تھا کہ وہ جلد ہی جواب دے گی وہی تھی جسے حکام نے گزشتہ ہفتے دی ٹائمز آف اسرائیل کو بتایا، جس میں 45 دنوں میں دس مغویوں کی رہائی کا تصور کیا گیا ہے۔

اس دوران عبرانی میڈیا نے اطلاع دی ہے کہ حماس نے زندہ یرغمالیوں کی تعداد کے بارے میں لچک دکھائی ہے جن کو وہ جزوی معاہدے میں رہا کرے گی – اب پانچ کے بجائے سات سے نو – لیکن اس کے اس مطالبے کے بارے میں  لچک نہیں دکھائی  کہ ایسی کسی ڈیل میں جنگ کے مستقل خاتمے کے لیے مذاکرات شامل ہوں۔

دوسری طرف عربی ذرائع ابلاغ نے اطلاع دی ہے کہ حماس کا وفد، جو کہ یرغمالیوں کی جنگ بندی کے جاری مذاکرات کے ایک حصے کے طور پر جمعے سے قاہرہ میں تھا، مصر چھوڑ گیا ہے۔ حماس کے ایک اہلکار نے نام ظاہر نہ کرنے کی شرط پر ایسوسی ایٹڈ پریس کو بتایا کہ یہ گروپ اس ہفتے کے آخر یا اگلے ہفتے مذاکرات کے لیے ایک وفد قطر بھیج رہا ہے۔