(سٹی 42)وفاقی وزیر ریلوے شیخ رشید کا کہنا ہے کہ چوہدری برادران بڑے دل والے ہیں، جب بھی عمران خان پر برا وقت آئے گا یہ انہیں ہی ووٹ دیں گے۔
تفصیلات کے مطابق مسلم لیگ (ق) کے قائد چوہدری پرویز الہیٰ کے گھر پر ملاقات کے بعد ان کے ہمراہ میڈیا سے گفتگو کرتے ہوئے ان کا کہنا تھا کہ مسلم لیگ (ق) کے ساتھ میرے تو کوئی تحفظات نہیں ہیں۔ایک سوال کے جواب میں انہوں نے کہا کہ میں یہاں چوہدری برادران کے لیے کسی کا کوئی پیغام نہیں لے کر آیا ہوں۔
شیخ رشید نے مسلم لیگ (ن) پر تنقید کرتے ہوئے کہا کہ مسلم لیگ (ن) کے لوگ پی ٹی آئی میں آنا نہیں چاہتے بلکہ وہ بس نواز شریف کے بیانیے کے ساتھ نہیں ہیں جبکہ پیپلز پارٹی، مسلم لیگ (ن) سے بہتر کھیلی ہے۔انہوں نے کہا کہ پہلے میں فروری کہتا تھا اور اب جنوری کی پیش گوئی کرتا ہوں کہ مسلم لیگ (ن) کے رہنمائوں کی آواز اٹھنے والی ہے۔
انہوں نے مزید کہا کہ مسلم لیگ (ن) بند گلی میں داخل ہوچکی ہے، انہوں نے اپنا بیانیہ تبدیل نہ کیا تو بھاری نقصان اٹھانا پڑے گا۔ نواز شریف کہتے تھے کہ ہماری لڑائی عمران خان سے نہیں کسی اور سے ہے، اب کہتے ہیں کہ عمران خان کو ہٹائو۔