سٹی 42 : استحکام پاکستان پارٹی کے صدر اور وفاقی وزیر مواصلات عبدالعلیم خان نے خانیوال آمد پر بلوچستان میں بس فائرنگ میں شہید لانس نائیک غلام سعید کے بچوں اور بھائی سے ملاقات کی اور اظہار تعزیت کیا ۔ 

عبدالعلیم خان نے میڈیا سے گفتگو میں کہا کہ ملک سے دہشتگردی کے ناسور کا خاتمہ کر کے رہیں گے، فیلڈ مارشل اور پاک فوج کے ہاتھ مضبوط کریں گے۔ انہوں نے کہا کہ ٹارگٹ کلنگ کا مقصد دوریاں پیدا کرنا ہے، پاکستان متحد رہے گا ۔ انہوں نے کہا کہ ملک کے ایک اور محافظ نے وطن پر جاں قربان کردی، ہر محب وطن شہری متاثرہ خاندانوں کے ساتھ کھڑا ہے۔ غمزدہ خاندانوں سے دکھ بانٹنے اور اظہار یکجہتی کیلئے آئے ہیں۔ 

عبدالعلیم خان نے کہا کہ دنیا بھر میں پراکسی وار ناکام، پاکستان کے دشمن کو مزید خفت اٹھانا ہو گی، دہشتگردوں کا ہدف پاکستان کو عدم استحکام سے دوچار کرنا ہے، پاک فوج کے جوان اپنے فرائض کی انجام دہی میں جانیں دے رہے ہیں۔ انہوں نے کہا کہ پاکستان لمبے عرصے سے دہشت گردی کے خلاف نبردآزما ہے۔ ماضی سے سیکھ کر ہمیں بہتر مستقبل کی مناسب تیاری کرنا ہو گی۔