سٹی42: ڈی آئی جی ٹریفک پنجاب کے احکامات پر صوبہ بھر میں ڈرائیونگ لائسنس کا اجرا جاری ہے اور شہریوں کو جدید سہولیات فراہم کی جا رہی ہیں۔ ترجمان ٹریفک کے مطابق سال کے پہلے 10 دنوں میں 3 لاکھ سے زائد ڈرائیونگ لائسنس جاری کیے جا چکے ہیں۔
ان میں سے 1 لاکھ 47 ہزار سے زائد شہریوں نے ریگولر ڈرائیونگ لائسنس بنوائے جبکہ 1 لاکھ 48 ہزار سے زائد شہریوں نے لرننگ، ریگولر اور انٹرنیشنل لائسنس کی تجدید کروائی۔ نئے سال کے دوران 1400 پاکستانی شہریوں نے انٹرنیشنل ڈرائیونگ پرمٹ حاصل کیا، اور 1 لاکھ 29 ہزار سے زائد شہری جدید آن لائن لائسنسنگ پورٹل سے فائدہ اٹھا چکے ہیں۔
ڈی آئی جی ٹریفک پنجاب محمد وقاص نذیر نے کہا کہ اتنی بڑی تعداد میں شہریوں کا ڈرائیونگ لائسنس بنوانا خوش آئند عمل ہے اور شہریوں نے ٹریفک پولیس پر اعتماد کیا ہے۔ انہوں نے مزید کہا کہ سال 2026 میں بھی شہریوں کا اعتماد بحال رکھا جائے گا اور لائسنسنگ سہولیات میں مزید اضافہ کیا جائے گا۔