ویب ڈیسک :آئی سی سی ٹی ٹوئنٹی ورلڈ کپ 2026 میں بھارتی کرکٹ ٹیم کی کامیابی کے بعد بھارتی کرکٹ بورڈ (بی سی سی آئی) نے کھلاڑیوں کے لیے 131 کروڑ روپے کی انعامی رقم کا اعلان کر دیا ہے۔
بھارتی کرکٹ بورڈ کی جانب سے جاری بیان میں کہا گیا ہے کہ ٹیم کی شاندار کارکردگی اور عالمی سطح پر کامیابی کو سراہنے کے لیے یہ انعامی رقم دی جا رہی ہے۔ حکام کے مطابق اس اعلان کا مقصد کھلاڑیوں اور سپورٹ اسٹاف کی محنت اور کارکردگی کو تسلیم کرنا ہے۔
بی سی سی آئی کے مطابق انعامی رقم کھلاڑیوں، کوچنگ اسٹاف اور سیلیکٹرز میں تقسیم کی جائے گی، اگرچہ اس وقت رقم کی تفصیلی تقسیم کا اعلان نہیں کیا گیا۔
یہ پہلا موقع نہیں جب بی سی سی آئی نے ورلڈ کپ کی فتح کے بعد بڑا انعامی اعلان کیا۔ 2024 ٹی 20 ورلڈ کپ جیتنے کے بعد بورڈ نے 125 کروڑ روپے کا انعام دیا تھا۔
اس وقت 15 کھلاڑیوں میں سے ہر ایک کو 5 کروڑ روپے ملے جبکہ ہر کوچنگ اسٹاف کے رکن کو 2.5 کروڑ روپے دیے گئے۔ 5 رکنی سیلیکشن کمیٹی کے ہر رکن کو جس کی قیادت اجیت اگارکر کر رہے تھے 1 کروڑ روپے دیے گئے۔
کرکٹ تجزیہ کاروں کا کہنا ہے کہ بی سی سی آئی کی جانب سے اس طرح کے بڑے انعامات نہ صرف کھلاڑیوں کی حوصلہ افزائی کرتے ہیں بلکہ عالمی سطح پر بھارتی کرکٹ کی مالی مضبوطی اور اثر و رسوخ کو بھی ظاہر کرتے ہیں۔