ویب ڈیسک:نجی اخبار کے ایڈیٹر طاہر نجمی کا مختصر علالت کے بعد انتقال ہوگیا۔
طاہر نجمی صاحب کراچی پریس کلب اور کراچی یونین آف جرنلسٹ کے سیکریٹری بھی رہ چکے ہیں۔ مرحوم طاہر نجمی جرنلسٹ گروپ گرین پینل کے سربراہ تھے۔مرحوم طاہر نجمی آرمی چیف ضیاء الحق کے خلاف صحافیوں کی تحریک میں بھی شامل رہے۔ تحریک کے دوران طاہر نجمی کو گرفتار کرکے سکھر جیل میں رکھا گیا تھا۔
ان کی نماز جنازہ بعد نماز جمعہ جامع مسجد ابوبکر بحریہ ٹاؤن میں ڈیڑھ بجے ادا کی جائے گی اور تدفین بحریہ ٹاؤن قبرستان میں ہوگی۔ان کے انتقال پر صدر، وزیراعظم، گورنر سندھ، وزیر اعلی سندھ سمیت سیاسی و سماجی شخصیات نے گہرے دکھ کا اظہار کیا ہے۔
وزیراعلیٰ سندھ مراد علی شاہ نے طاہر نجمی کے انتقال پر گہرے دکھ کا اظہار کرتے ہوئے کہا کہ طاہر نجمی صحافت کی دنیا میں ایک معتبر نام تھا۔ وزیراعلیٰ سندھ نے مرحوم کے بلند درجات اور اہلخانہ کے صبر کے لیئے دعا کی۔
وزیر اطلاعات سندھ شرجیل انعام میمن نے تعزیت کرتے ہوئے کہا کہ مرحوم ایک با اصول اور منجھے ہوئے صحافی تھے۔ طاہر نجمی نے تمام عمر اظہارِ رائے کی آزادی کے لئے جدوجہد کی۔ طاہر نجمی اردو صحافت میں استاد کا درجہ رکھتے تھے۔ ان کے انتقال سے شعبہ صحافت کا نا پر ہونے والا خلا پیدا ہوگیا ہے۔