ویب ڈیسک: بھارتی ریاست تلنگانہ حکومت نے ٹریفک چالان کی ترسیل کے نظام میں اہم تبدیلی کرتے ہوئے واٹس ایپ، ایس ایم ایس اور ای میل کو سرکاری طور پر مجاز الیکٹرانک ذرائع کے طور پر منظور کر لیا ہے۔
یہ فیصلہ ٹرانسپورٹ کمشنر کی سفارش پر غور کے بعد کیا گیا اور مرکزی موٹر وہیکل رولز 1989 کے رول 167 میں حالیہ ترمیم کے مطابق نافذ کیا گیا ہے۔ 2 جون 2026 کو تلنگانہ گزٹ میں شائع ہونے والے نوٹیفکیشن کے بعد یہ فیصلہ فوری طور پر مؤثر ہو گیا ہے۔
نوٹیفکیشن کے مطابق اب ٹریفک چالان شہریوں کو ایس ایم ایس، واٹس ایپ اور ای میل کے ذریعے بھیجے جائیں گے، جس کا مقصد نظام کو مزید ڈیجیٹل اور مؤثر بنانا ہے۔
حکومت نے تمام گاڑی مالکان کو ہدایت کی ہے کہ وہ ایک ماہ کے اندر واہن پورٹل پر اپنے موبائل نمبر اور ای میل ایڈریس کو اپ ڈیٹ کریں تاکہ چالان کی ترسیل میں کسی قسم کی رکاوٹ پیش نہ آئے۔
مزید کہا گیا ہے کہ مقررہ مدت کے بعد واہن پورٹل میں درج رابطہ تفصیلات پر بھیجا گیا چالان قانونی طور پر موصول شدہ تصور کیا جائے گا، چاہے وہ ایس ایم ایس، واٹس ایپ یا ای میل کے ذریعے جاری کیا گیا ہو۔