ویب ڈیسک: امریکا میں اسلحہ کی آن لائن خریداری کے نظام میں بڑی تبدیلی کی تجویز سامنے آگئی ہے، جس کے تحت مخصوص شرائط پوری کرنے والے خریدار لائسنس یافتہ ڈیلرز سے بندوقیں براہِ راست اپنے گھر منگوا سکیں گے۔ اگر یہ پالیسی منظور ہو گئی تو ملک میں اسلحہ کی فروخت کے طریقہ کار میں نمایاں تبدیلی آئے گی۔

مجوزہ ضابطے کے مطابق خریدار کی آن لائن شناخت کی تصدیق، بیک گراؤنڈ چیک، مقامی قانون نافذ کرنے والے اداروں کو اطلاع اور سات روزہ انتظار کی مدت مکمل ہونے کے بعد اسلحہ گھر تک پہنچایا جا سکے گا۔ موجودہ نظام میں آن لائن خریدی گئی بندوق خریدار کو خود گن اسٹور سے وصول کرنا ہوتی ہے۔

اس مجوزہ پالیسی سے آن لائن اسلحہ فروخت کرنے والی کمپنی GrabAGun کو فائدہ پہنچنے کا امکان ظاہر کیا جا رہا ہے۔ کمپنی کے بورڈ رکن اور شیئر ہولڈر ڈونلڈ ٹرمپ جونیئر بھی ہیں، جس کے باعث یہ معاملہ سیاسی اور کاروباری حلقوں میں توجہ کا مرکز بن گیا ہے۔

تاہم ٹرمپ جونیئر کے ترجمان نے واضح کیا ہے کہ اس پالیسی کی تیاری میں ان کا کوئی کردار نہیں تھا، جبکہ کمپنی کے چیف ایگزیکٹو مارک نیماتی کا کہنا ہے کہ انہیں بھی اس تجویز کا پہلے سے علم نہیں تھا۔ البتہ ان کے مطابق اگر قانون منظور ہو جاتا ہے تو کمپنی کے لیے نئے کاروباری مواقع پیدا ہو سکتے ہیں۔

دوسری جانب اسلحہ کنٹرول کے حامی گروپوں اور متعدد گن شاپ مالکان نے مجوزہ پالیسی پر خدشات کا اظہار کیا ہے۔ ان کا مؤقف ہے کہ بندوقوں کی براہِ راست گھروں تک ترسیل سے عوامی سلامتی، غیر قانونی اسلحے کی منتقلی اور مقامی اسلحہ فروشوں کے کاروبار پر منفی اثرات مرتب ہو سکتے ہیں۔

یہ تجویز فی الحال عوامی رائے کے مرحلے میں ہے اور حتمی منظوری کے بعد ہی اس پر عمل درآمد کیا جائے گا۔