( عمر اسلم ) نائب صدر مسلم لیگ (ن) مریم نواز کا کہنا ہے کہ سابق وزیراعظم میاں نوازشریف کی سرجری کورونا وائرس کے باعث ملتوی ہوئی، مزدوروں کے عالمی دن کے موقع پر انہیں خراج تحسین بھی پیش کیا۔
نائب صدر مسلم لیگ (ن) مریم نواز نے ٹویٹ کیا کہ میاں نوازشریف کی سرجری کورونا کے باعث ملتوی ہوئی، ڈاکٹرز کے مطابق وہ ہائی رسک پیشنٹ ہیں، اس لئے احتیاط ضروری ہے۔ تاہم لندن میں ان کا علاج جاری ہے۔ مریم نواز نے میاں نوازشریف کی صحت یابی کے لیےعوام سے دعاؤں کی اپیل بھی کی۔
میاں صاحب کی سرجری کور ؤنا کے باعث ملتوی ہوئی ہے۔ ڈاکٹرز کے مطابق وہ high risk patient ہیں اس لئیے ہر طرح کی احتیاط لازم ہے۔ ان کا علاج جاری ہے۔ آپ سب رمضان کریم کی خصوصی دعاوں میں انکو یاد رکھیں۔ https://t.co/XdBisJguRy
— Maryam Nawaz Sharif (@MaryamNSharif) May 1, 2020
مریم نواز نے کہا کہ آج کا دن ان لوگوں کے نام کرتی ہوں جو اس وبا کے دوران اپنے فرائض انجام دیتے ہوئے تکلیف میں مبتلا انسانیت کی خدمت کررہے ہیں۔
مریم نواز کا کہنا ہے کہ آج کے دن ان تمام افراد کو سلام پیش کرتے ہیں جن کا خون پسینہ ہماری زندگیوں کی روانی کا باعث ہے۔ انکا کہنا تھا کہ کورونا کے باعث سب سے زیادہ مزدور طبقہ متاثر ہوا ہے۔
آج ہم ان تمام افراد کو سلام پیش کرتے ہیں جن کا خون پسینہ ہماری زندگیوں کی روانی کا باعث ہے۔ کورونا کی وجہ سے سب سے زیادہ متاثر ہمارا مزدور طبقہ ہوا ہے۔رمضان کے بابرکت مہینے میں جب اللہ تعالی کی رحمتیں سمیٹنے کا وقت ہے تو نیکیوں میں سب سے عظیم نیکی مخلوق خدا کی تکلیف دور کرنا ہے۔
یاد رہے سابق وزیراعظم میاں نواز شریف کو گزشتہ برس پلیٹ لیٹس کی کمی، دل کے عارضہ سمیت دماغ کو خون پہنچانے والی شریانوں میں سنگین تنگی کے شدید مرض کے باعث علاج کیلئے لندن لیجایا گیا۔ تاہم نواز شریف کی طبیعت جوں کی توں ہے اور لندن میں ان کے معالجین تاحال پلیٹ لیٹس کی کمی کی تشخیص نہیں کر سکے۔
پلیٹ لیٹس کی کمی دور نہ ہونے کے باعث برطانوی ڈاکٹرز نواز شریف کی انجیوگرافی نہیں کرسکے اور نہ ہی کیروٹڈ آرٹریز میں سٹنٹ ڈالے جاسکے ہیں۔ برطانیہ میں علاج کی مطلوبہ سہولت نہ ملنے کے خدشہ کے پیش نظر نواز شریف کو پاکستانی معالجین نے علاج کیلئے لندن کی بجائے امریکہ جانے کا مشورہ دیا تھا۔