سٹی42: میانمار میں زلزلہ کے دو دن بعد بھی بہت سی  گری ہوئی عمارتوں کے ملبہ میں دبے  ہوئے لوگوں کی تلاش جاری ہے، اس دوران زلزلہ کے مرکز کے قریب ترین شہر سائی گنگ  میں سکول کی ایک گری ہوئی  عمارت  کے ملبہ سے چار افراد کو  زندہ نکال لیا گیا۔ اس سکول کے ملبہ سے  ایک ٹیچر  کی لاش بھی  برآمد ہوئی ہے۔  زلزلہ جمعہ کو دوپہر سے پہلے آیا تھا    اور اس سے اب تک  سترہ سو افراد کے جاں بحق ہونے کی تصدیق ہو چکی ہے۔ 

زلزلہ آیا تو سکول مین بچے اور ٹیچر معمول کی تعلیمی سرگرمیوں میں مصروف تھے۔  زلزلہ کے ابتدائی جھٹکے اتنے شدید تھے کہ عمارت فوراً ہی ڈھے گئی اور کمروں کے اندر موجود سٹوڈنٹس اور ٹیچرز کو باہر نکلنے کی مہلت ہی نہیں ملی۔
حکام کا کہنا ہے کہ ساگانگ کے علاقے میں منہدم ہونے والی اسکول کی عمارت سے چار افراد کو بچا لیا گیا ہے اور ایک کی لاش برآمد ہوئی ہے۔

میانمار کے فائر سروسز ڈیپارٹمنٹ کی جانب سے اپ ڈیٹ میں کہا گیا ہے کہ ریسکیورز جائے وقوعہ پر مزید ممکنہ زندہ بچ جانے والوں کی تلاش جاری رکھے ہوئے ہیں۔