ویب ڈیسک: پاکستانی شوبز انڈسٹری میں ایک ناقابلِ فراموش نام اداکارہ صائمہ نور نے ڈرامہ "میں منٹو نہیں ہوں" میں اپنے مشہور گانے "دل دیاں لگیاں" کا جادو دوبارہ جگا دیا.
صائمہ نور کی یہ شاندار اداکاری سوشل میڈیا پر وائرل ہو رہی ہے اور ناظرین نے اُن کے انداز، وقار اور دلکشی کی بے حد تعریف کی ہے۔ مداحوں کا کہنا تھا کہ صائمہ نے ایک چھوٹے اسکرین سین کو سینما کی سطح تک پہنچا دیا جو کہ بہت کم فنکاروں کے بس کی بات ہے۔
صائمہ کی پرفارمنس کو "نایاب تحفہ" قرار دیا جا رہا ہے اور لوگوں کا کہنا ہے کہ وہ آج بھی کئی نسلوں کو اپنی اداکاری سے مسحور کر دیتی ہیں۔
یاد رہے کہ ڈرامہ "میں منٹو نہیں ہوں" اپنے جاندار کرداروں اور جرات مندانہ موضوعات کی وجہ سے پہلے ہی خبروں میں ہے۔ اس میں ہمایوں سعید مرکزی کردار ادا کر رہے ہیں، جو معروف ادیب سعادت حسن منٹو کے بے باک نظریات سے متاثر ایک پروفیسر کے روپ میں نظر آتے ہیں۔
سجل علی نے گینگسٹر کی بیٹی "محمل سراج" کا کردار ادا کیا ہے جبکہ صنم سعید ایک ہم عصر استاد کے روپ میں کہانی کو مزید گہرائی فراہم کرتی ہیں۔
اس نوجوان اور توانا کاسٹ کے درمیان بھی صائمہ نور نے اپنی موجودگی سے اسکرین پر سب کی توجہ حاصل کر لی۔ آصف رضا میر اور صبا فیصل جیسے تجربہ کار اداکاروں کے ساتھ صائمہ کی اداکاری نے ناظرین کو لالی وُڈ کے سنہری دور کی یاد دلا دی اور ثابت کیا کہ وہ آج بھی جدید ٹی وی اسکرین پر اپنی موجودگی سے جادو جگا سکتی ہیں.