(ویب ڈیسک) سینئر اداکار ایوب کھوسو نے کہا ہے کہ انہیں ایک ڈرامے میں عتیقہ اوڈھو کے ساتھ ایک رومانوی سین ریکارڈ کروانے میں بہت مشکل پیش آئی تھی۔
سینئراداکار نےحال ہی میں ایک نجی ٹی وی کے شو میں شرکت کی جہاں اپنی زندگی کے مختلف واقعات کا ذکر کرتے ہوئے اداکاری کے حوالے سے بھی گفتگو کی۔
پروگرام میں مداح نے اداکار سے دلچسپ سوال کرتے ہوئے کہا کہ آپ دکھنے میں بہت سخت لگتے ہیں، آپ کوئی گانا یا رومانوی ڈائیلاگ سنا دیں؟مداح کے سوال پر ایوب کھوسو نے ایک قصہ سناتے ہوئے بتایا کہ ہم ایک ڈرامہ’’دشت‘‘ کر رہے تھے جس میں میں نے ایک سخت قبائلی شخص کا کردار ادا کیا تھا۔

اداکار نے اپنی بات کو جاری رکھتے ہوئے کہا کہ ڈرامے کے لیے مجھے اداکارہ عتیقہ اوڈھو کے ساتھ رومانوی سین کرنا تھا جسے کرنے میں مجھے بہت مشکل پیش آئی، ہم بلوچوں میں رومانویت کا معیار کچھ اور ہے، عتیقہ اوڈھو کا ہاتھ پکڑ کر تعریف کرنی تھی، وہ سین میرے لیے کرنا بہت مشکل تھا۔
ایوب کھوسو نے ہنستے ہوئے مداح کو کہا میں معافی چاہتا ہوں شاید آپ کے سوال کا جواب درست طریقے سے نہیں دے سکا، کیونکہ نہ مجھے گانا آتا ہے اور نہ ہی کوئی رومانوی ڈائیلاگ۔