گارڈن ٹائون (زین مدنی ) پاکستان ٹی وی انڈسٹری کی معروف اداکارہ انوشے اشرف نے پاکستان میں مقبول ہوتے ترکش ڈرامے ' ارطغرل غازی' میں حلیمہ سلطان کا مرکزی کردار اداکرنے والی اسرا بلجیک سے پاکستانیوں کے رویے پر معذرت کرلی۔
ترک ڈرامہ ” ارتغرل غازی “ کو پاکستان میں وہ مقبولیت حاصل ہوئی ہے جواسے ترکی میں بھی نہیں ملی،ٹک ٹاک ہو یاٹویٹر،انسٹا گرام ہویا پھر فیس بک ہر طرف ہی اس ڈرامے کے مرکزی کردارارطغرل اور اس کے بہادر ساتھیوں کی تصاویر سوشل میڈیا پر گردش کر رہی ہیں۔ اس ڈرامے میں ارطغرل غازی کی بیوی حلیمہ سلطان کا کردار ترک اداکارہ اور ماڈل اسرا بلجیک نے نبھایا ہے جن کے کام کوجہاں خوب پذیرائی مل رہی ہیں وہی کچھ ان پر تنقید بھی کر رہے ہیں۔اسرا بلجیک کی سوشل میڈیا پر مغربی لباس زیب تن کئے شیئر کی جانے والی تصویروں پر پاکستانی مداحوں نے انہیں خوب تنقید کا نشانہ بنایا۔
پاکستانی اداکارہ انوشے اشرف نے پاکستانیوں کے اس رویے پر ترک اداکارہ سے پوری قوم کی جانب سے معذرت کرتے ہوئے ان کی خوبصورتی کی تعریف کی اور لکھا کہ پاکستانیوں کے دہرے رویے سے وہ تہہ دل سے معذرت خواہ ہیں۔
How is the respect of an entire religion dependant on the length of one’s shirt? @esbilgic getting negative feedback for her choice of clothing through judgemental Pakistani fans. She’s not Halime Sultan kids. She’s an actor! ????#Ertugrul pic.twitter.com/5gkr7h4RpU
— Anoushey Ashraf (@Anoushey_a) May 10, 2020
انوشے اشرف نے اپنے ٹویٹ میں لکھا کہ وہ اسرا بلجیک کے تمام ڈرامے اسی شوق سے دیکھیں گی اور انہیں صرف شخصیت پر ہی پرکھیں گی نہ کہ کسی کردار سے جو انہوں نے بخوبی ادا کیا ہے۔
یاد رہے کہ وزیر اعظم عمران خان کی خواہش پر پاکستان ٹیلی وژن نے یکم رمضان المبارک سے ترک ڈرامے دیریلیش ارطغرل کی نشریات شروع کی ہیں، دیریلیش ارطغرل کو پی ٹی وی پر نشر کیے جانے کے موقع پر وزیر اعظم عمران خان نےخصوصی پیغام جاری کیا تھا اور انہوں نے ترک ڈرامے کو نہ صرف اسلامی بلکہ پاکستانی ثقافت و تاریخ کے بھی قریب قرار دیا تھا۔
ترک ڈرامہ پاکستانیوں کے ذہنوں پر چھا گیا ہے،’’ ارطغرل غازی‘‘ نے پی ٹی وی پر نشر ہوتے ہی ریکارڈ بنادیئے ہیں،یوٹیوب پر تو پی ٹی وی نے جھنڈے گاڑ دیے ہیں،اس ڈرامے نے پی ٹی وی کو ایک بار پھر زندہ کردیا ہے، ارطغرل غازی' کے یوٹیوب چینل پر صرف 15 روز میں 10 لاکھ سبسکرائبرز ہو گئے۔
دوسری جانب پاکستان کو ’’ میرے پاس تم ہو‘‘ اور ’’ پیارے افضل‘‘ سمیت متعدد کامیاب سیریلز دینے والے مصنف خلیل الرحمان قمر نے ترک ڈرامہ کی مقبولیت کو دیکھتے ہوئےپاکستان میں بھی ’’ ارطغرل غازی‘‘ کی طرز پر تاریخی ڈرامہ بنانے کا اعلان کردیا۔