سٹی 42: پاکستان سپر لیگ کا پہلا مرحلہ مکمل ہوچکا ہے،دو ٹیمیں ایونٹ سے باہر ہوچکی ہیں،بقیہ چار ٹیمیں کل سیمی فائنل میں نمبرد آزما ہوں گی۔ لاہور قلندر ز کا مقابلہ کراچی کنگز اور ملتان سلطانز کا مقابلہ پشاور زلمی سے ہوگا۔دونوں میں لاہور کے قذافی سٹیڈیم میں کھیلے جائیں گے۔

 سیمی فائنل  میں پہنچتے ہی  لاہور قلندرز کو ایک بڑا دھچکا لگ گیا گیا۔رنز بنانے  کی مشین اپنے ملک روانہ ہوگئی۔ آسٹریلوی کھلاڑی کرس لین نے اعلان کیا کہ وہ پی ایس ایل چھوڑ کر فوری طور پر وطن واپس جا رہے ہیں۔

جارح مزاج بیٹسمین نے آخری لیگ میچ میں لاہور قلندرز کی جانب سے 55 گیندوں پر 113 رنز کی شاندار اننگز کھیل کر لاہور قلندرز کو ملتان سلطانز کے خلاف فتح دلواکر ٹیم کو سیمی فائنل میں پہنچانے میں اہم کردار ادا کیا لیکن کرس لین اب سیمی فائنل میں لاہور کو دستیاب نہیں ہوں گے۔

کرس لین نے سوشل میڈیا پر اعلان کیا تھا کہ انہوں نے پاکستان میں اپنا قیام انجوئے کیا لیکن موجودہ حالات میں انہوں نے گھر واپس جانے کا فیصلہ کیا ہے۔ زندگی میں کرکٹ کے علاوہ بھی بہت کچھ ہے اور یہی ان کے فیصلے کی بنیاد ہے، انہوں نے امید ظاہر کی کہ ناک آؤٹ مرحلے میں ٹیم اچھا پرفارم کرے گی۔

اس سے قبل جنوبی افریقا کے ڈیوڈ ویزے اور سری لنکا کے سیکوگے پرسنا نے بھی لاہور قلندرز کے ساتھ پی ایس ایل میں اپنا سفر ادھورا چھوڑ کر وطن واپسی کا اعلان کیا تھا۔غیر ملکی کرکٹرز نے پی ایس ایل ادھورا چھوڑنے کا فیصلہ پاکستان کرکٹ بورڈ کی پیشکش کے بعد کیا۔

یاد رہے پہلے مرحلے میں 11 کھلاڑیوں نے لیگ چھوڑنے کا فیصلہ کیا تھا، جس کے بعد اسلام آباد یونائٹیڈ کے 3 پلیئرز بھی گھر چلے گئے تھے۔ کرس لین، ڈیوڈ ویزے اور پرسنا کی وطن واپسی کے بعد لاہور قلندرز کے پاس فی الحال بین ڈنک، سمت پٹیل اور ڈین ویلاس بطور غیر ملکی پلیئرز موجود ہیں۔ کراچی کنگز کے ایلکس ہیلز اور مچل میک کلینگن بھی پاکستان سپر لیگ چھوڑ کر گھروں کو روانہ ہو چکے ہیں۔