غوث الاعظم رو ڈ (زین مدنی ) ورسٹائل فنکار احسن خان نے کہا ہے کہ کورونا وائرس  ہم سب کے لیے ایک آزمائش ہے، تمام ڈراموں اور فلموں کی شوٹنگز کا سلسلہ تھم گیا ہے، ہنگامی بنیاد پر کی جانے والی عید کی درجنوں فلموں کی شوٹنگز ملتوی ہوگئیں، کوئی نہیں جانتا کہ مستقبل قریب میں سینما گھروں کا کیا بنے گا۔

  اداکار احسن خان کا دنیا میں تیزی سے پھیلتے جان لیوا کورونا وائرس کے حوالے سے کہنا تھا کہ پوری دنیا لاک ڈاؤن میں ہے، کسی خاص طبقے کا اس سے تعلق نہیں ہے، کورونا کی صورت میں ہماری زندگیوں میں ایک بہت بڑا چیلنج سامنے آیا ہے، جو اس سے پہلے کبھی نہیں آیا، دنیا بھر کے انسانوں نے کبھی ایسی خطرناک اور جان لیوا وبا کا سامنا نہیں کیا تھا۔

اداکار کا کہنا تھا کہ وہ ذاتی طور پر ایسا محسوس کر رہے ہیں کہ رَبّ العزت نے ہمیں کچھ دکھایا ہے، رَبّ تعالیٰ فرماتا ہے کہ میں بندوں کو آزماتا ہوں،  کورونا ہم سب کی آزمائش ہے، ہم اس پریشانی سے کس طرح نکلتے ہیں، یہ ہم سب پر منحصر ہے۔

انہوں نے بتایا کہ کچھ ٹیلی ویژن ڈرامے جو پہلے سے مکمل تھے، وہ آن ایئر ہیں اور فرصت میں ناظرین انہیں دیکھ رہے ہیں۔ احسن خان نے کہا کہ ٹی وی شوز وغیرہ کی ریکارڈنگ کم ہو رہی ہے، کچھ فنکار رمضان المبارک کی ٹرانسمیشن میں مصروف ہیں ہمیں مشکل کی اس گھڑی میں اپنے اردگرد کے لوگوں کا خیال رکھنا ہے۔

I know people in #Pakistan think it's ok to troll actors here and judge them, atleast spare the cast of #Ertugral it's bloody shameful what's going on! Who the hell are we to do this to them?

— Ahsan Khan (@Ahsankhanuk) May 11, 2020

علاوہ ازیں  احسن خان نے سماجی رابطوں کی ویب سائٹ  ٹویٹر پر  ایک ٹویٹ کی ہے جس میں انہوں نے ترکی کے مقبول ترین ڈرامے ” ارطغرل غازی“ کے فنکاروں  پرتنقید  کرنے والوں کو  آڑے ہاتھوں لیتے ہوئے کہا کہ ”میں جانتاہوں کہ پاکستان میں لوگ سوچتے ہیں کہ یہاں اداکاروں پر تنقید کرنا اور انہیں جج کرنا ٹھیک ہے، کم از کم ارطغرل کی کاسٹ اور فنکاروں کو تو بخش دیں، یہ جو کچھ بھی ہورہا ہے نہایت شرمناک ہے ہم ہوتے کون ہیں ان کے ساتھ یہ سب کرنے والے؟