ملک اشرف :لاہورہائیکورٹ نے چودہ مزدوروں کو بھٹہ مالک کی قید سے بازیاب کرا لیا، رہا ہونے والوں میں بچے، خواتین اور مرد بھی شامل ہیں۔
تفصیلات کے مطابق جسٹس سردار احمد نعیم نے اللہ دتہ کی درخواست پرسماعت کی، درخواست گزار کی جانب سے وکیل نے موقف اختیار کیا کہ کہ پھول نگر کے بھٹہ مالک جہانگیر احمد نے اس کے موکل کے رشتہ داروں کو غیر قانونی طور پر اپنے پاس رکھا ہوا ہے،زبردستی ان سے جبری مشقت لی جارہی ہے، بھٹہ مزدوروں کو حکومتی ریٹ کے مطابق اجرت بھی نہیں دی جاتی۔
وکیل نے استدعا کی کہ عدالت بھٹہ مزدوروں کو رہا کرنے کا حکم دے، عدالتی حکم پر پولیس نے بھٹہ مزدوروں کو بازیاب کرا کر عدالت میں پیش کردیا۔ بھٹہ مالکان کے وکیل کا کہنا تھا کہ مزدوروں نے ایڈوانس رقم لے رکھی ہے،جبری مشقت لینے کا الزام درست نہیں، عدالت نے تمام دلائل سننے کے بعد بھٹہ مزدوروں کو رہا کرنے کا حکم دے دیا۔