ویب ڈیسک:عالمی مارکیٹ میں سونے کی قیمتوں میں جمعہ کے روز بھی کمی ریکارڈ کی گئی، جس کے باعث قیمتی دھات کی قیمت اس ہفتے مجموعی طور پر خسارے کی جانب بڑھ رہی ہے۔
بین الاقوامی مارکیٹ رپورٹ کے مطابق اسپاٹ گولڈ کی قیمت میں 0.5 فیصد کمی ہوئی، جس کے بعد سونا 4 ہزار 193.58 ڈالر فی اونس پر ٹریڈ کرتا رہا۔ ماہرین کے مطابق ہفتہ وار بنیاد پر سونے کی قیمت میں تقریباً 3.1 فیصد کمی کا امکان ہے۔
رپورٹ کے مطابق بڑھتی ہوئی مہنگائی اور امریکی فیڈرل ریزرو کی جانب سے شرح سود میں اضافے کے خدشات نے سونے کی خریداری کو متاثر کیا ہے، جس کے باعث سرمایہ کار نئی سرمایہ کاری سے محتاط رویہ اختیار کر رہے ہیں۔
ماہرین کا کہنا ہے کہ عالمی سیاسی صورتحال، خصوصاً امریکا اور ایران کے درمیان کشیدگی اور ممکنہ امن پیش رفت سے متعلق خبروں نے بھی مارکیٹ میں غیر یقینی صورتحال پیدا کی ہے، جس کے اثرات سونے کی قیمتوں پر پڑ رہے ہیں۔
تجزیہ کاروں کے مطابق اگر امریکی مرکزی بینک کی جانب سے سخت مالیاتی پالیسی برقرار رکھنے کا عندیہ دیا گیا تو سونے پر مزید دباؤ آ سکتا ہے، جبکہ قیمتیں 4 ہزار ڈالر فی اونس کے قریب آنے کا امکان بھی ظاہر کیا جا رہا ہے۔
رپورٹ میں مزید بتایا گیا ہے کہ دیگر قیمتی دھاتیں بھی دباؤ کا شکار ہیں، جبکہ عالمی کموڈٹی مارکیٹ میں سرمایہ کاروں کو مسلسل غیر یقینی صورتحال کا سامنا ہے۔