(ویب ڈیسک) بھارت کی ریاست اترپردیش کے شہر چترکوٹ سے عجیب و غریب واقعہ سامنے آیا ہے، شادی کی رسومات شروع ہونے سے پہلے ہی بیوٹی پارلر گئی دلہن موقع غنیمت جان کر اپنے عاشق کے ساتھ رفو چکر ہوگئی ۔ جب والد کو اس بات کا پتہ چلا تو ان کے ہوش اڑ گئے ۔انہوں نے فوری عاشق سمیت 3 افراد کے خلاف پولیس میں  بیٹی کےاغوا  کی شکایت درج  کروا دی۔ اس دوران جب لڑکی کو اس بات کاپتہ چلا تو اس نے ایک ویڈیو جاری کرکے ایک الگ ہی کہانی بتائی ۔ پولیس اب حقیقت سے پردہ اٹھانے کی کوشش کر رہی ہے۔ 

بھارتی اردو  چینل کی نیوز ویب  کے مطابق یہ کیس چتر کوٹ  شہر کوتوالی علاقے کے چھپرا مافی گاؤں کا ہے۔ 25 سالہ دیویا کی شادی اس کے گھر والوں نے مانک پور کے نگر گاؤں کے رہنے والے دھننجے سے طے کی تھی۔ بارات 10 فروری کو پہنچنی تھی۔ گھر میں شادی کی تیاریاں زوروں پر تھیں۔ منڈپ کی تقریب طے تھی، لیکن ایک دن پہلے، یعنی 9 فروری کو، خاتون اپنا میک اپ کروانے کے لیے سیتا پور قصبے کے اپوروا بیوٹی پارلر گئی۔ اپنے والد اور چھوٹی بہن کے ساتھ، دیویا اپنا میک اپ کروانے کے بعد پارلر سے نکل گئی۔ موقع کا فائدہ اٹھاتے ہوئے دیویا اپنے عاشق آدتیہ سنگھ چوہان کے ساتھ کار میں فرار ہوگئی۔ جب اس کے والد نے اسے بھاگتے دیکھا تو کافی دیر تک اسے روکنے کی کوشش کی لیکن دیویا پہلے ہی بھاگ چکی تھی۔ اس کے بعد والد روتے ہوئے کوتوالی تھانے پہنچے۔

دیویا  کےوالد نے آدتیہ سنگھ چوہان، شیویندرا اور گریما ڈکشٹ کے خلاف اغوا کا مقدمہ درج کرایا۔ اس کے بعد دیویا شکلا نے اپنے عاشق آدتیہ سنگھ چوہان کے ساتھ کار میں بیٹھے ہوئے اپنی ویڈیو جاری کی۔ جس میں اس نے صاف  صاف بتادیا کہ وہ اپنی مرضی سے بھاگ رہی ہے،میرے والدین مجھے ایک بڑی عمر کے آدمی سے شادی کرنے پر مجبور کر رہے تھے۔ جب میں نے انکار کیا تو انہوں نے مجھے تشدد کا نشانہ بنایا۔ میں نے اپنے عاشق آدتیہ سنگھ چوہان سے پریاگ راج میں آریہ سماج کی رسومات کے مطابق شادی کی۔

25 سالہ دیویا نےاب اس نے حکومت سے تحفظ کی اپیل کی ہے۔ شادی کی تصاویر سوشل میڈیا پر وائرل ہو رہی ہیں۔ پولیس کا کہنا ہے کہ لڑکی کو بازیاب کرا لیا جائے گا اور جلد ہی اس کا عدالت میں بیان ریکارڈ کرایا جائے گا۔