سٹی42: اسرائیل کی فوج حالیہ ہفتوں میں غزہ میں کارروائیوں کے دوران، اسرائیل کی سرحد کے ساتھ ساتھ اپنے بفر زون کو بڑے پیمانے پر بڑھا رہی ہے۔ اس بفر زون میں رفح کا پورا شہر شامل کیا جائے گا اور یہ فلسطین کی ساحلی پٹی پر مشتمل غزہ انکلیو کا تقریباً 20 فیصد رقبہ بنے گا۔
ٹائمز آف اسرائیل نے ایک رپورٹ میں بتایا کہ آئی ڈی ایف کے فوجی دستے رفح اور خان یونس کے درمیان نام نہاد 'موراگ کوریڈور' قائم کرنے کےلئے کام کر رہے ہیں۔
آئی ڈی ایف نے کئی ہفتے پہلے رفح کے پورے علاقے کے رہائشیوں کےلیے انخلاء کی وارننگ بھی جاری کی تھی۔
'موراگ کوریڈور' کے مکمل طور پر قائم ہونے کے بعد، جنوبی غزہ میں آئی ڈی ایف کا بفر زون مصر کی سرحد - فلاڈیلفی کوریڈور کے علاقے سے لے کر تقریباً 5 کلومیٹر دور خان یونس کے مضافات تک پھیلے گا، اور اس میں پورا شہر رفح شامل ہوگا۔
غزہ کے ساتھ اسرائیل کی سرحد پر دوسری جگہوں پر بھی IDF کے بفر زون کو وسیع کیا جا رہا ہے، اب یہ بفر زون زیادہ تر علاقوں میں کئی سو میٹر سے لے کرتقریباً 2 کلومیٹر (1.2 میل) تک چوڑا ہے۔
حالیہ ہفتوں میں فلسطینیوں کو جاری کیے گئے IDF کے انخلاء کے انتباہی نقشوں میں توسیع شدہ بفر زون کو دیکھا جا سکتا ہے۔