( ویب ڈیسک )عالمی مارکیٹ میں خام تیل کی قیمتوں میں نسبتاً استحکام کے باوجود پٹرول اور ڈیزل کی منڈیوں میں سپلائی بحران کے خدشات بڑھنے لگے ہیں۔
رپورٹس کے مطابق ایران جنگ کے باعث مشرق وسطیٰ سے توانائی کی ترسیل متاثر ہوئی، جس کے بعد ایندھن کی قیمتیں بلند سطح پر برقرار ہیں۔
ماہرین کا کہنا ہے کہ خام تیل کی قیمتوں میں کمی کے باوجود ریفائنری صلاحیت، کم ذخائر اور عالمی سپلائی مسائل کے باعث پٹرول اور ڈیزل کی مارکیٹ دباؤ کا شکار ہے۔
یورپ میں ڈیزل ریفائننگ مارجن ریکارڈ سطح تک پہنچ گئے، جبکہ امریکا میں بھی ریفائنری منافع کی شرح میں نمایاں اضافہ دیکھا گیا۔
روس کی جانب سے ڈیزل برآمدات پر پابندی کے فیصلے نے بھی عالمی مارکیٹ میں تشویش بڑھا دی ہے، جس کے باعث یورپ، برازیل، ترکی اور دیگر ممالک متبادل سپلائی ذرائع تلاش کر رہے ہیں۔
رپورٹ کے مطابق امریکا میں جولائی کے آغاز پر پٹرول کے ذخائر 2021 کے بعد کم ترین سطح پر پہنچ گئے، جبکہ عالمی تیل مصنوعات کے ذخائر بھی گزشتہ اوسط سطح سے کم ہیں۔
ماہرین کے مطابق اگر عالمی سطح پر سپلائی میں مزید رکاوٹیں آئیں تو ایندھن کی قیمتوں میں دوبارہ اضافہ ہو سکتا ہے۔