ملک اشرف: پٹرولیم مصنوعات کی قیمتوں میں حالیہ اضافے کو لاہور ہائیکورٹ میں چیلنج کردیا گیا۔

جوڈیشل ایکٹوازم پینل کی جانب سے دائرکی گئی متفرق درخواست میں موقف اختیارکیاگیاہے کہ حکومت نے پیٹرول کی قیمت میں 55 روپے فی لیٹر اضافہ کر دیا ہے،جو غیر قانونی اور عوام دشمن اقدام ہے۔

درخواست میں مؤقف اختیارکیاگیاہے کہ پٹرولیم قیمتوں میں اضافے سےٹرانسپورٹ،بجلی،زراعت اور اشیائے خوردونوش مہنگی ہوں گی،آئل مارکیٹنگ کمپنیوں کے پاس 15 دن کا سٹاک موجود ہونے کے باوجود قیمتیں بڑھانا غیر قانونی ہے۔

درخواست میں استدعاکی گئی ہےکہ عدالت اوگرا اور وزارت توانائی کو 15 دن کے پیٹرولیم ذخائر کی تفصیلات پیش کرنے کا حکم دے اورلاہور ہائیکورٹ پٹرولیم مصنوعات کی قیمتوں میں اضافے کے نوٹیفکیشن کو کالعدم قرار دے۔