سٹی 42 : نیشنل کاؤنٹر ٹیررازم سینٹر پبی میں 9ویں انٹرنیشنل پاکستان آرمی ٹیم اسپرٹ مقابلے کی افتتاحی تقریب کا انعقاد کیا گیا۔ 

آئی ایس پی آر کے مطابق ان مقابلوں کا مقصد دوست ممالک کی افواج کے درمیان فوجی تعاون کو فروغ دینا ہے۔ افتتاحی تقریب کے ساتھ 60 گھنٹوں پر مشتمل پیٹرولنگ ایکسرسائز کا باقاعدہ آغاز ہوگیا۔ تقریب میں پاک فوج کے ایک سینئر افسر نے بطور مہمان خصوصی شرکت کی۔ 

مقابلے میں 19 دوست ممالک کی 24 بین الاقوامی ٹیمیں اور فوجی مبصرین شریک ہیں۔ شرکت کرنے والے ممالک میں بحرین، بنگلہ دیش، بیلاروس، مصر، عراق، اردن، سعودی عرب، ملائیشیا، مالدیپ، مراکش، نیپال، قطر، سری لنکا، ترکیہ، امریکہ اور ازبکستان شامل ہیں۔ اس کے علاوہ انڈونیشیا، میانمار اور تھائی لینڈ مقابلے میں بطور مبصر شریک ہیں۔ 

پاکستان کی جانب سے پاک فوج اور پاک بحریہ کی 16 ٹیمیں مقابلے میں حصہ لے رہی ہیں، ساتھ ہی پاک فضائیہ کے مبصرین بھی مشق کا حصہ ہیں۔ 

پاکستان آرمی ٹیم اسپرٹ ایک مشن مخصوص اور ٹاسک اورینٹڈ پیشہ ورانہ فوجی مشق ہے جو ہر سال پاکستان میں منعقد کی جاتی ہے، مشق میں اعلیٰ جسمانی فٹنس، ذہنی صلاحیت اور پیشہ ورانہ فوجی مہارت کا مظاہرہ ہوتا ہے، مشق کا فوکس مشکل ذیلی عسکری مشنز کے دوران تیز رفتار فیصلہ سازی پر ہے، مشق حقیقی آپریشنل ماحول میں کرائی جاتی ہے، مشق کا بنیادی مقصد ٹیم اسپرٹ کے ذریعے استقامت کو فروغ دینا ہے۔ 

یہ مشق سپاہیانہ بنیادی صلاحیتوں کو نکھارنے کے ساتھ شریک افواج کے درمیان باہمی تعاون اور ہم آہنگی کو بہتر بناتی ہے۔ مشق کے دوران ایک دوسرے کے بہترین تجربات کا تبادلہ بھی کیا جاتا ہے۔