(مانیٹرنگ ڈیسک) مہنگائی سے تنگ عوام کیلئے بری خبر، یوٹیلیٹی سٹورز پر مختلف اشیائے ضروریہ کی قیمتوں میں اضافہ کر دیا گیا۔
ذرائع کے مطابق یوٹیلیٹی سٹورز پرمختلف برانڈز کی اشیائے ضروریہ کی قیمتوں میں اضافے کا نوٹیفکیشن جاری کردیا گیا۔ نوٹیفکیشن کے مطابق مختلف برانڈز کی 900 گرام چائے کی قیمت 400 روپے تک مہنگی ہو گئی, 900 گرام چائے کی قیمت 905 روپے سے بڑھ کر 1305 روپے ہوگئی, ٹی وائیٹنر کی قیمتوں میں 100 روپے کا اضافہ ہوا ہے۔
یوٹیلیٹی اسٹورز پر دلیے، سیریل ، نوڈلز،سوئیوں اور نمکو کی قیمتوں میں بھی اضافہ کردیا گیا،بچوں کے دودھ کے 800 گرام پیکٹ کی قیمت 260 روپے بڑھ گئی۔ مختلف مصالحہ جات کی 50 گرام میں 50 روپے تک اضافہ ہوا ہے۔
سرخ مرچ 100 گرام کی قیمت 84 روپے کا جبکہ 100 گرم مصالحے کی قیمت میں 42 روپے تک اضافہ ہوا۔ کسٹرڈ ،کالی مرچ ،میتھی ،جام ،مشروبات سمیت کئی اشیاء کے دام بھی بڑھ گئے ہیں۔ شہد کی 100 گرام کی بوتل 100 روپے مہنگی ہوگئی ہے جبکہ ایک کلو اچار کا پیک 57 روپے تک مہنگا ہوگیا ہے، کھیر کا 55 گرام کا پیک 20 روپے، 200 گرام چھوارے 40 روپے اورجھاڑو کی قیمت 9 روپے بڑھ گئی ۔
ترجمان یوٹیلٹی سٹورز کے مطابق یوٹیلیٹی سٹورز پر دستیاب اشیاء کی کوالٹی سب سے اعلیٰ اور قیمتیں سب سے کم ہیں۔ملک بھر کے تمام اسٹورز پر ڈیمانڈ اینڈ سپلائی کی بہتری کیلئے کچھ برانڈزکی اشیا کی قیمتوں میں اضافہ کیا گیا ہے جو ان برانڈز کی طرف سے ہے، تمام یوٹیلیٹی سٹورز پر سبسڈائزڈ گھی 300روپے فی کلوگرام، چینی 70 روپے فی کلومیں دستیاب ہے۔20 کلو آٹے کا تھیلا 800روپے پر وافر مقدار میں دستیاب ہیں۔