ویب ڈیسک: آئی ایس پی آر کے زیرِ اہتمام ونٹر انٹرن شپ پروگرام 12 جنوری سے ملک بھر میں بھرپور انداز میں جاری ہے، جس کا مقصد نوجوانوں کو قومی سلامتی، ملکی تاریخ اور پاک فوج کے کردار سے آگاہ کرنا ہے۔ اس پروگرام کے تحت طلبہ کو تعلیمی سیشنز کے ساتھ ساتھ عملی اور معلوماتی سرگرمیوں میں بھی شامل کیا جا رہا ہے۔

آئی ایس پی آر ونٹر انٹرن شپ پروگرام کے دوران خیبرپختونخوا کی مختلف جامعات سے تعلق رکھنے والے طلبہ و طالبات نے قلعہ بالاحصار پشاور کا دورہ کیا۔ اس دورے کا مقصد نوجوانوں کو تاریخی ورثے، قومی دفاع اور سیکیورٹی سے متعلق آگاہی فراہم کرنا تھا۔

طلبہ نے قلعہ بالاحصار کی تاریخی، دفاعی اور تہذیبی اہمیت کے بارے میں تفصیلی معلومات حاصل کیں۔ دورے کے دوران انسپکٹر جنرل فرنٹیئر کور نارتھ (آئی جی ایف سی نارتھ) کے ساتھ طلبہ کی خصوصی نشست بھی منعقد ہوئی، جس میں انہیں خطے کی سیکیورٹی صورتحال اور درپیش چیلنجز پر بریفنگ دی گئی۔ آئی جی ایف سی نارتھ نے طلبہ کے سوالات کے تفصیلی اور تسلی بخش جوابات بھی دیے۔

شرکاء نے یادگارِ شہداء پر پھول چڑھا کر وطن کے لیے جانوں کا نذرانہ پیش کرنے والے شہداء کو خراجِ عقیدت پیش کیا۔ بعد ازاں طلبہ نے فرنٹیئر کور میوزیم کا دورہ کیا، جہاں انہیں ایف سی کی تاریخ، خدمات اور قربانیوں سے آگاہ کیا گیا۔

اس موقع پر طلبہ کا کہنا تھا کہ قلعہ بالاحصار کے دورے نے انہیں تاریخ کو بہتر انداز میں سمجھنے اور ماضی پر فخر کرنے کا موقع فراہم کیا۔ شرکاء نے فرنٹیئر کور کی خدمات کو سراہتے ہوئے اس مثبت اور قابلِ تحسین اقدام پر منتظمین کا شکریہ ادا کیا۔