سٹی42: دوران ڈیوٹی شہید ہونے والے پولیس ملازمین کے لیے شہداء پیکیج کی منظوری دے دی گئی ہے۔ اس حوالے سے صوبائی وزیر قانون ملک صہیب احمد بھرتھ کی زیر صدارت کمیٹی کا اجلاس ہوا جس میں شہداء پیکیج کی مختلف کیٹیگریز کا جائزہ لیا گیا۔ اجلاس میں سیکرٹری داخلہ احمد جاوید قاضی، اے آئی جی عمران احمد، ڈی آئی جی پولیس ویلفیئر غازی صلاح الدین اور ایڈیشنل سیکرٹری داخلہ نے شرکت کی۔
اجلاس میں 17 شہداء پولیس اہلکاروں کو پیکیج دینے کے لیے کیسز کا جائزہ لیا گیا۔ فیصل آباد کے اے ایس آئی عبید اللہ آصف، ملتان کے اے ایس آئی محمد اکبر، جھنگ کے غلام صابر، غلام فرید، راولپنڈی کے ہیڈ کانسٹیبل ارتفا علی، سرگودھا کے کانسٹیبل عبد الشفیق اور محمد عمران، اٹک کے کانسٹیبل قدیر خان، فیصل آباد کے کانسٹیبل محمد آصف، ڈی جی خان کے رئیس راجہ، لاہور کے عامر لیاقت علی، راولپنڈی کے سجاد حسین، جہلم کے حیدر علی شاہ، اوکاڑہ کے محمد سیف اللہ، اور فیصل آباد کے ٹریفک وارڈن منور حسین کے لیے پیکیج ٹو منظور کیا گیا۔
بہاولپور کے کارپورل ممتاز حسین اور راجن پور کے کانسٹیبل محمد عاقب کے لیے پیکیج تھری کی منظوری دی گئی۔
پیکیج ٹو کے تحت اے ایس آئی کے ورثاء کو 50 لاکھ روپے، گھر اور دیگر مراعات جبکہ کانسٹیبل و ہیڈ کانسٹیبل کے ورثاء کو 40 لاکھ روپے، گھر اور دیگر سہولیات دی جائیں گی۔ پیکیج تھری کے تحت شہداء کو 35 لاکھ روپے اور دیگر مراعات دی جائیں گی۔ اجلاس میں پیکیج تھری کے قواعد میں تبدیلی کا بھی جائزہ لیا گیا اور فیصلہ کیا گیا کہ اس کیٹیگری کے شہداء کے ورثاء کو گھر کی سہولت بھی دی جائے گی، جس کے لیے پنجاب کابینہ سے منظوری لی جائے گی۔