سٹی42: پنجاب حکومت نے لاہور رنگ روڈ پر ٹریفک کی نگرانی اور مؤثر انتظام کے لیے جدید کمانڈ اینڈ کنٹرول سنٹر کے قیام کا فیصلہ کیا ہے۔ منصوبے کی منظوری صوبائی وزیر تعمیرات و مواصلات ملک صہیب احمد بھرتھ نے دی ، اُنہوں نے اس حوالے سے منعقدہ اجلاس کی صدارت بھی کی۔ اجلاس میں سیکرٹری سی اینڈ ڈبلیو سہیل اشرف، چیئرمین پنجاب رنگ روڈ اتھارٹی فیصل فرید اور دیگر محکموں کے اعلیٰ افسران شریک ہوئے۔
اجلاس میں منصوبے کے فنی اور انتظامی پہلوؤں پر تفصیلی بریفنگ دی گئی۔ جس میں بتایا گیا کہ کمانڈ اینڈ کنٹرول سنٹر رنگ روڈ اتھارٹی کے ہیڈ آفس میں قائم کیا جائے گا اور اس منصوبے پر 871 ملین روپے لاگت آئے گی۔ صوبائی وزیر کے مطابق منصوبے کو 4ماہ کے اندر مکمل کر لیا جائے گا۔
کمانڈ اینڈ کنٹرول سنٹر میں جدید ترین مانیٹرنگ ٹیکنالوجی نصب کی جائے گی، جس میں 42 بڑی اسکرینیں اور 20 تجزیاتی (اینالٹیکل) اسکرینیں شامل ہوں گی۔ اس جدید نظام کے ذریعے لاہور رنگ روڈ پر سفر کرنے والی روزانہ تقریباً ڈیڑھ لاکھ گاڑیوں کی مسلسل نگرانی کی جائے گی۔
منصوبے کے تحت نہ صرف ٹریفک کے بہاؤ کو مانیٹر کیا جائے گا بلکہ گاڑیوں کی جانب سے ٹریفک قوانین کی خلاف ورزیوں جیسے اوور اسپیڈنگ، لین ڈسپلن، سگنل توڑنے، اور غلط سمت میں سفر کرنے کے واقعات کو بھی ریکارڈ کیا جائے گا۔ اس مقصد کے لیے ہائی ریزولوشن کیمروں، خودکار نمبر پلیٹ شناختی نظام (ANPR)، اور جدید ڈیٹا اینالیسس سافٹ ویئرز کا استعمال کیا جائے گا۔
ملک صہیب احمد بھرتھ نے کہا کہ لاہور رنگ روڈ پر جدید کمانڈ اینڈ کنٹرول سسٹم کے قیام سے نہ صرف شہریوں کو بہتر اور محفوظ سفری سہولیات میسر آئیں گی بلکہ حادثات میں بھی نمایاں کمی آئے گی۔ انہوں نے کہا کہ پنجاب حکومت شہریوں کو عالمی معیار کی انفراسٹرکچر اور سمارٹ ٹریفک مینجمنٹ سہولیات فراہم کرنے کے لیے پرعزم ہے۔
انہوں نے مزید کہا کہ یہ نظام ٹریفک پولیس، پنجاب سیف سٹیز اتھارٹی، اور رنگ روڈ اتھارٹی کے درمیان مؤثر رابطے کو یقینی بنائے گا، جس سے حادثات کی فوری اطلاع اور ہنگامی کارروائی ممکن ہوگی۔ صوبائی وزیر نے افسران کو ہدایت کی ہے کہ منصوبے کی تعمیراتی رفتار تیز کی جائے اور مقررہ مدت میں اسے مکمل کیا جائے تاکہ لاہور رنگ روڈ کو ملک کی جدید ترین اسمارٹ ہائی وے میں تبدیل کیا جا سکے۔