ویب ڈیسک : اسپیکر قومی اسمبلی سردار ایاز صادق نے کہا ہے کہ ڈاکٹر عبدالقدیر خان اور دیگر سائنسدانوں کی خدمات کو قوم ہمیشہ یاد رکھے گی، یومِ تکبیر ہمارے قومی عزم، اتحاد اور قربانیوں کا عکاس ہے۔

اسپیکر قومی اسمبلی سردار ایاز صادق نے یومِ تکبیر کے حوالے سے اپنے پیغام میں کہا کہ 28 مئی قومی غیرت، خود مختاری اور دفاع کی علامت ہے، ایٹمی دھماکے پاکستان کی تکنیکی مہارت اور قومی اتحاد کا مظہر ہیں، پاکستان کی دفاعی پالیسی امن پر مبنی ہے۔ انہوں نے کہا کہ پاکستان دشمن کی ہر جارحیت کا بھرپور جواب دینے کی صلاحیت رکھتا ہے، ذوالفقار بھٹو اور نواز شریف کو ملک کو جوہری طاقت بنانے پر خراجِ تحسین پیش کرتا ہوں۔

سردار ایاز صادق نے کہا کہ ایٹمی دھماکوں کا فیصلہ نواز شریف کا تاریخ ساز اقدام تھا، جوہری صلاحیت پاکستان کی خودانحصاری اور دفاعی خود کفالت کی بنیاد ہے۔ انہوں نے مزید کہا کہ 28 مئی کے ساتھ 10 مئی کے اضافے نے پاکستان کے دفاع اور سلامتی کو نئی روح پھونکی۔ آپریشن بنیان مرصوص دشمن کے ناپاک عزائم کو خاک میں ملانے کا ثبوت ہے، افواجِ پاکستان نے بری، بحری اور فضائی سرحدوں کا جرأت مندانہ دفاع کیا، پاکستان پر حملہ کرنے والوں کو واضح پیغام مل چکا ہے، پاکستان صرف عسکری نہیں، قومی اتحاد سے بھی ناقابل شکست ہے، اگر 28 تاریخ کو نواز شریف نے دھماکے نہ کیے ہوتے تو یہ لڑائی مختلف انداز میں ہوتی۔