روزینہ علی : آج رات کے موسم کی صورتحال کے حوالے سے محکمہ موسمیات کا کہنا ہے کہ ملک کے بیشتر بالائی علاقوں میں موسم سرد اور مطلع ابرآلود رہے گا، تاہم شمال مشرقی پنجاب، کشمیراور گلگت بلتستان میں چند مقامات پرہلکی بارش، بونداباندی کی توقع ہے۔ 

منگل کے روزموسم کی   صورتحال کے متعلق محکمہ موسمیات کا کہنا ہے کہ اسلام آباد میں موسم سرد اور مطلع جز وی ابر آلود رہے گا۔خیبرپختونخوا کے بیشتر اضلاع میں موسم سرد اور بالائی علا قوں میں مطلع جزوی ابرآلود رہے گا، جبکہ صبح کے اوقات میں پشاور، چارسدہ، مردان اور صوابی میں دھند چھائے رہنے کا امکان ہے۔ 

محکمہ موسمیات کے مطابق پنجاب کے بیشتر اضلاع میں موسم خشک جبکہ مری گلیات اور گردونواح میں سرد اور مطلع جزوی ابر آلود رہے گا۔ صبح کے اوقات میں نارووال، سیالکوٹ، لاہور، گوجرانوالہ، اوکاڑہ، ساہیوال، فیصل آباد، ٹوبہ ٹیک سنگھ، جھنگ، خانیوال، ملتان، بہا ولپور، ڈیرہ غا زی خان اور گردو نواح میں سموگ اور دھند چھائے رہنے کا امکان ہے۔

محکمہ موسمیات کا کہنا ہے کہ بلوچستان کے بیشتر اضلاع میں موسم خشک جبکہ شمالی اضلاع میں سرد رہے گا۔ اس کے علاوہ سندھ کے بیشتراضلاع میں موسم خشک جبکہ رات اور صبح کے اوقات میں سرد رہے گا۔ کشمیر  اورگلگت بلتستان میں موسم سرد اور مطلع جزوی ابر آلود رہنے کا امکان ہے۔