سٹی42: پنجاب ایجوکیشن فاؤنڈیشن میں مختلف شعبہ جات میں نئی بھرتیوں کا اعلان کر دیا گیا ہے۔ ادارے کی جانب سے ڈپٹی ڈائریکٹر، اسسٹنٹ ڈائریکٹر، آفیسرز، سبجیکٹ اسپیشلسٹس، نیٹ ورک سپورٹ انجینئر، ایگزیکٹو اسسٹنٹ اور ڈرائیورز سمیت 100 سے زائد آسامیاں مشتہر کی گئی ہیں۔
تفصیلات کے مطابق ڈپٹی ڈائریکٹر پروگرامز کی 18 نشستوں پر بھرتی کی جائے گی، جن کے لیے ماہانہ تنخواہ 1 لاکھ 96 ہزار 250 روپے مقرر کی گئی ہے۔ اسسٹنٹ ڈائریکٹر پروگرامز کے لیے 26 آسامیاں دستیاب ہیں، جن کی تنخواہ 1 لاکھ 31 ہزار 250 روپے ہوگی۔ اسی طرح آفیسر پروگرامز کی 40 نشستوں کے لیے تنخواہ 93 ہزار 750 روپے رکھی گئی ہے۔
سبجیکٹ اسپیشلسٹ کے طور پر انگلش، ریاضی، سائنس اور اردو کے مضامین کے لیے 8 آسامیاں مختص کی گئی ہیں، جب کہ نیٹ ورک سپورٹ انجینئر اور ایگزیکٹو اسسٹنٹ کی اسامیاں بھی شامل ہیں۔ اس کے علاوہ، ڈرائیورز کے لیے 10 نشستیں مختص کی گئی ہیں جن کے لیے ماہانہ تنخواہ 57 ہزار 500 روپے ہوگی۔
درخواست دینے کے لیے امیدوار کی عمر 33 سے 40 سال کے درمیان ہونی چاہیے۔ بھرتیوں کا مکمل اشتہار، اہلیت کے معیار، درخواست دینے کا طریقہ اور آخری تاریخ کا اعلان جلد پنجاب ایجوکیشن فاؤنڈیشن کی جانب سے کیا جائے گا۔