سٹی 42 : کورونا وائرس دنیا بھر میں قہر بن کر ٹوٹا ہے،اس نے کئی گھر اجاڑے ہیں،لاکھوں انسان زندگیاں گنوا بیٹھے ہیں تو کروڑ ں اپنی نوکریوں،کاروبار،جمع پونجی سے محروم ہیں، لاک ڈائون اور پابندیوں سے پوری دنیا کی معیشت اس سے متاثر ہوئی ہے۔لیکن اس مشکل صورتحال کے باوجود دنیا میں کئی افراد ایسے بھی ہیں جن کے لیے یہ لاک ڈاؤن زحمت کے بجائے رحمت بن گیا اور انھیں میں سے ایک بھارتی استاد مہیش کاپسی بھی ہیں۔
بھارتی ریاست مہارشتڑا کے شہر اورنگ آباد کے ڈرائنگ استاد مہیش کاپسی، جنہیں رواں سال مارچ اپریل سے قبل کوئی جانتا بھی نہ تھا۔ تاہم لاک ڈاؤن کے دوران مہیش کے فن نے انہیں بین الاقوامی طور پر ایک مشہور آرٹسٹ بنا دیا۔
لاک ڈاؤن کے دوران جب مہیش کو ملازمت سے فارغ کیا گیا تو اس وقت ان کی ماہانہ آمدنی 10000 روپے تھی لیکن ملازمت چھوڑنے کے بعد مہیش 80000 روپے ماہانہ کمانے لگے۔
ہوا کچھ یوں کہ ڈرائنگ ٹیچر مہیش لاک ڈاؤن کے دوران فارغ وقت میں ٹک ٹاک پر اپنی ڈرائنگ ویڈیوز اپلوڈ کرنے لگے اور دیکھتے ہی دیکھتے مہیش کی پینٹنگز اتنی مشہور ہوئیں کہ بھارت کے فلمی ستارے بھی پینٹر مہیش کے مداح ہو گئے۔بھارتی اداکار رتیش دیش مکھ نے مہیش کاپسی کی پینٹنگ ویڈیو اپنے ٹوئٹر اکاؤنٹ پر شیئر کرتے ہوئے ان کا شکریہ ادا کیا۔
Incredible art -Mahesh Kapse thank you ???????? Loved it https://t.co/3XtkUcBnae
— Riteish Deshmukh (@Riteishd) June 8, 2020
ویڈیو میں مہیش کو کسی پینٹنگ برش کا استعمال کیے بغیر ہاتھ کی انگلیوں سے مہارت کے ساتھ ادکار رتیش دیش مکھ کی پینٹنگ بناتے دیکھا جاسکتا ہے۔رتیش دیش مکھ کے علاوہ آسٹریلین کرکٹر ڈیوڈ وارنر اور سابق انگلش اسٹار کیون پیٹرسن بھی مہیش کی بنائی ہوئی ویڈیوز اپنے اکاؤنٹ پر شیئر کر چکے ہیں۔یہی نہیں بھارت کے مراٹھی فنکار بھی مہیش کی پینٹنگز کے قائل ہو چکے ہیں۔