کلیم اختر:صوبائی وزیر لیبر فیصل ایوب کھوکھر کی زیر صدارت پنجاب سوشل سکیورٹی (پیسی) گورننگ باڈی کا اجلاس منعقد ہوا، جس میں سیکرٹری لیبر نعیم غوث، کمشنر پنجاب سوشل سکیورٹی محمد علی سمیت دیگر ممبران نے شرکت کی۔
اجلاس میں مزدوروں اور ان کے خاندانوں کی فلاح و بہبود کے لیے متعدد اہم فیصلوں کی منظوری دی گئی۔
اجلاس میں ڈسکہ روڈ ڈسپنسری کو سوشل سکیورٹی بنیادی مرکز صحت سیالکوٹ کے درجے پر، ایمرجنسی سنٹر انڈس شوگر ملز کو سوشل سکیورٹی ڈسپنسری کے درجے پر اور پنڈی بھٹیاں ڈسپنسری کو بنیادی مرکز صحت کے درجے پر اپ گریڈ کرنے کی منظوری دی گئی۔ اس کے علاوہ واہ کینٹ میں نئی سوشل سکیورٹی ڈسپنسری قائم کرنے کا فیصلہ کیا گیا۔
رحیم یار خان میں 50 بستروں پر مشتمل پیسی ہسپتال جبکہ لاہور ڈیفنس روڈ پر 100 بستروں پر مشتمل کارڈیک ہسپتال کے قیام کی ہدایت بھی دی گئی۔ اجلاس میں بتایا گیا کہ 166ویں، 167ویں اور 168ویں اجلاس میں منظور شدہ سکیمز پر عملدرآمد کی رپورٹ پیش کی گئی۔
مزید برآں پیسی کے بڑے 12 ہسپتالوں کو سولر پر منتقل کرنے، پیسی پنشن ریگولیشنز 2003 اور گورننگ باڈی قواعد 1966 میں ترامیم، 2025-26 میں زائد قیمت پر ادویات کی خریداری کے سپلائی آرڈرز اور مریم نواز راشن کارڈ ونگ سمیت دیگر ونگز کے لیے پوسٹوں کی شفٹنگ کی منظوری بھی دی گئی۔
اجلاس میں فلڈ ریلیف میڈیکل کیمپس میں ڈیوٹی سرانجام دینے والے ڈاکٹروں اور دیگر عملے کو اعزازیہ دینے کی تجویز بھی پیش کی گئی۔
فیصل ایوب کھوکھر کا کہنا تھا کہ ڈینگی کے ممکنہ خدشات کے پیش نظر ہسپتالوں میں بہترین انتظامات کئے جائیں۔