ثمرہ فاطمہ: جرمنی سے تعلق رکھنے والے یورپی پارلیمنٹ کے رکن ٹامسز فروئلخ کی قیادت میں یورپی وفد نے لاہور میوزیم کا دورہ کیا۔ بلغاریہ سے یورپی پارلیمنٹ کے رکن اسٹینسلاو ڈوبرینوف اسٹویانوف بھی وفد میں شامل تھے۔
برینڈن برگ لینڈ ٹیگ کے رکن ڈینس ہوہلوخ اور بیلجیئم کے سینئر کونسلر عمیر خان بھی وفد کا حصہ تھے۔
ڈائریکٹر لاہور میوزیم تاثیر احمد اور ایڈیشنل سیکرٹری سیاحت خواجہ وقار احمد نے وفد کا استقبال کیا۔ اس موقع پر وفد کو لاہور میوزیم کی تاریخی اہمیت، یہاں محفوظ نوادرات اور خطے کے ثقافتی ورثے کے حوالے سے تفصیلی بریفنگ دی گئی۔
یورپی وفد نے لاہور میوزیم کی مختلف گیلریوں کا دورہ کیا اور تاریخی و ثقافتی نوادرات کا مشاہدہ کیا۔ آثارِ قدیمہ، تاریخ، فنون اور خطے کی ثقافتی روایات سے متعلق نوادرات نے وفد کی خصوصی توجہ حاصل کی۔
اس موقع پر وفد کے دورے کا مقصد پاکستان اور یورپ کے درمیان ثقافتی روابط کو فروغ دینا اور تاریخی و ثقافتی ورثے کے حوالے سے باہمی تبادلے کے مواقع پیدا کرنا قرار دیا گیا۔