سٹی 42 : جمعیت علما اسلام کے سربراہ مولانا فضل الرحمان نے کہا ہے کہ پاک سعودی معاہدہ اسلامی دنیا کی وحدت کے لئے نقطہ آغاز ثابت ہوگا، یہ معاہدہ دونوں  ممالک کے درمیان برادرانہ تعلقات کی گہرائی میں اضافہ کرے گا۔ 

 مولانا فضل الرحمان نے سعودی سفیر نواف بن سعید المالکی کے اعزاز میں ایک عشائیہ کا اہتمام کیا۔ اس موقع پر گفتگو میں مولانا فضل الرحمان نے کہا کہ ےیوآئی  کی جانب سے  مملکت سعودی عرب اور اسلامی جمہوریہ پاکستان کے درمیان تاریخی معاہدے پر دستخط کے موقع پر محترم سفیر  کو دلی مبارکباد اور نیک خواہشات پیش کرتا ہوں۔ انہوں نے کہاکہ یہ معاہدہ  اجتماعی سلامتی کے ایک مضبوط ستون اور امت مسلمہ کے  درمیان مطلوبہ اتحاد کی نمائندگی کرے گی۔ 

 مولانا فضل الرحمان نے کہا کہ پاکستان اور سعودی عرب میں مسلم امہ کی قیادت کی صلاحیت موجود ہے، پاک سعودی دفاعی معاہدہ ثبوت ہے کہ امت مسلمہ کے مفادات  ایک ہیں ۔ مملکت سعودی عرب، حرمین شریفین کی نگہبانی کے اعزاز کے ساتھ، تمام مسلمانوں کے دلوں میں ایک بلند مقام رکھتی ہے۔ انہوں نے کہا کہ پاکستان کے عوام حرمین شریفین کے دفاع کو ایک عظیم اعزاز اور مقدس مذہبی فریضہ سمجھتے ہیں، یہ معاہدہ اسلامی مقدسات کے وقار اور تحفظ کی نمائندگی کرتا ہے، یہ مبارک دور اسلامی ممالک کے درمیان قریبی تعاون کی ترغیب اور ملت اسلامیہ کی مضبوطی، یکجہتی اور اتحاد کو بحال کرنے کا محرک ثابت ہوگا۔ 

انہوں نے مزید کہاکہ اللہ تعالیٰ سے دعا گو ہیں کہ وہ اس مبارک قدم کو برکت دے ، مملکت اور پوری اسلامی قوم کے عروج  اور نشاۃ ثانیہ کا سبب بنے ۔ 

سعودی سفیر  نواف بن سعید المالکی نے اس موقع پر کہا کہ مولانا فضل الرحمان کو ہمیشہ اتحاد امت کے حوالے سے فکرمند پایا ہے، پاکستانی قوم کو اس معاہدے پر مبارکباد پیش کرتا ہوں ۔ انہوں نے کہاکہ امت مسلمہ جسد واحد ہے ۔ 

تقریب میں مولانا راشد سومرو ، مولانا سعید یوسف ، انجینئیر ضیاء الرحمان ،مولانا اسجد محمود، سنیٹر احمد خان ، سنیٹر دلاور خان ، نور عالم خان، مفتی اویس عزیز ، مفتی ابرار ، جلال الدین ایڈوکیٹ نے شرکت کی۔