سٹی 42 : وزیر خارجہ اسحاق ڈار نے آج پائیدار ترقی کے اہداف کی تکمیل کے پروگرام (SAP) کی اسٹیئرنگ کمیٹی کے 45ویں اجلاس کی صدارت کی، جس میں اہم متعلقہ شراکت داروں نے شرکت کی۔ 

اسحاق ڈار نے مقامی کمیونٹیز کو بنیادی ترقیاتی ڈھانچے کے منصوبوں کی نشاندہی میں شامل کرنے کی اہمیت پر زور دیا، انہوں نے حکومت کے اس عزم کا اعادہ کیا کہ وسائل کو پاکستان کے شہریوں کے بہترین مفاد میں استعمال کیا جائے گا، وسائل کا ہم آہنگی سے پائیدار ترقی کے اہداف (SDGs) سے میل بٹھایا جائے گا۔ 

اجلاس میں فیصلہ کیا گیا کہ غیر مختص فنڈز واپس کر دیے جائیں گے۔ اجلاس میں عمل درآمد کرنے والے اداروں کو ہدایت دی گئی کہ مختص شدہ فنڈز کو مؤثر اور ذمہ داری سے استعمال کریں۔ 

وزرائے توانائی، تجارت، مذہبی امور، اور سائنس و ٹیکنالوجی اجلاس میں شریک ہوئے۔ اس کے علاوہ معاونِ خصوصی طارق باجوہ، وفاقی سیکرٹریز، قومی اسمبلی کے اراکین، اور صوبائی حکومت کے افسران نے بھی اجلاس میں شرکت کی۔