ویب ڈیسک: پاک فوج کے ترجمان لیفٹیننٹ جنرل احمد شریف چودھری نے کہا ہے کہ پاکستان ایک ذمہ دار ریاست کی حیثیت سے خطے میں امن کا داعی ہے اور ہر ممکن کوشش کرتا ہے کہ کشیدگی نہ بڑھے۔

ڈی جی آئی ایس پی آر نے یہ بات امریکی اخبار نیویارک ٹائمز کو دیے گئے انٹرویو میں کہی، جس میں انہوں نے کہا کہ بھارت نے نور خان ایئر بیس سمیت دیگر مقامات کو نشانہ بنایا تاہم پاکستان نے صبر و تحمل کا مظاہرہ کرتے ہوئے اپنے دفاع تک محدود رہ کر کارروائی کی۔

لیفٹیننٹ جنرل احمد شریف چودھری کا کہنا تھا کہ دونوں ممالک کے اعلیٰ عسکری افسران کے درمیان رابطے کا مؤثر مکینزم موجود ہے اور پاکستان کی فضائی صلاحیت مکمل طور پر بحال اور فعال ہے۔

انہوں نے سوال اٹھایا کہ پاکستان نے اپنے جانی و مالی نقصانات کے حوالے سے شفافیت کا مظاہرہ کیا، مگر کیا بھارت بھی اتنی ہی دیانتداری سے کام لے رہا ہے؟

دوسری جانب امریکی اخبار کے مطابق 7 مئی کو بھارت کے یکطرفہ میزائل حملے کے بعد پاکستان نے تحمل سے کام لیا اور صرف دفاعی اقدامات کیے۔ اخبار کے مطابق پاک فضائیہ نے موثر جوابی کارروائی کرتے ہوئے بھارت کے 6 جنگی طیارے مار گرائے۔

اخبار نے یہ بھی لکھا کہ پاکستان نے سیزفائر کا احترام کرتے ہوئے ذمہ داری کا مظاہرہ کیا، مگر بھارت کی جانب سے اشتعال انگیزی کا سلسلہ تاحال جاری ہے۔