سٹی 42: معروف شاعر سید سلمان گیلانی لاہور میں انتقال کرگئے 

سید سلمان گیلانی طویل عرصے سے علیل تھے۔معروف شاعر، نعت گو اور مزاحیہ شاعری کے ماہر سید سلمان گیلانی لاہور میں انتقال کر گئے ہیں۔۔وہ ختم نبوت کے پرجوش حامی، تحریک ختم نبوت کے مجاہد سید امین گیلانی کے صاحبزادے تھے اور اپنے والد کی طرح دینِ اسلام، نعت رسول ﷺ اور مزاحیہ انداز میں سماجی مسائل پر شاعری کے لیے مشہور تھے۔ ان کی شاعری محفلوں کو چار چاند لگاتی تھی، خاص طور پر نعت اور طنزیہ کلام میں ان کا منفرد انداز تھا۔

انہیں "شاعرِ ختمِ نبوت" اور "قائد جمعیت کے رفیق خاص" کہا جا رہا ہے۔سید سلمان گیلانی 1951 میں لاہور میں پیدا ہوئے اور زندگی بھر ادب، مذہب اور سماجی مسائل پر اپنا قلم استعمال کرتے رہے۔ ان کی کتاب "میری باتیں ہیں یاد رکھنے کی" بھی کافی مقبول رہی، جس میں ان کی یادداشتیں اور واقعات شامل ہیں۔

سید سلمان گیلانی  نہ صرف پاکستان بلکہ بیرون ممالک میں بھی   مشاعرے پڑھا کرتے تھے اور ختم نبوت اور نعت کے حوالے سے بھی جانے  جاتے تھے ۔  سید سلمان گیلانی  کی وفات پر  ادبی  حلقے سوگوار ہیں ۔ شعرا کرام  ،سیاسی و سماجی شخصیات  اور مذہبی حلقے بھی  تعزیت کررہے ہیں ۔ 

سید سلمان گیلانی طویل عرصے سے علیل تھے اور شیخ زید ہسپتال میں زیر علاج تھے ۔سلمان گیلانی کی عمر چوہتر سال اور وارثان میں ایک بیٹا دو بیٹیاں ہیں ۔سلمان گیلانی مزاحیہ شاعری کے حوالے سے مقبول تھے ۔نماز جنازہ کا اعلان تاحال نہیں کیاگیا