مریم مظہر:باغات کے شہر لاہور میں موسم گرم اور خشک ہے، جبکہ سورج کی تپش کے باعث گرمی کی شدت میں اضافہ ہو گیا ہے۔
موسم کی تازہ صورتحال کے مطابق لاہور کا موجودہ درجہ حرارت 31 ڈگری سینٹی گریڈ ریکارڈ کیا گیا ہے، جبکہ زیادہ سے زیادہ درجہ حرارت 35 ڈگری سینٹی گریڈ تک جانے کا امکان ہے۔
شہر میں ہوا میں نمی کا تناسب 61 فیصد ریکارڈ کیا گیا، جبکہ ہوائیں 5 کلومیٹر فی گھنٹہ کی رفتار سے چل رہی ہیں۔ آج ہواؤں کی رفتار 2 سے 6 کلومیٹر فی گھنٹہ رہنے کی توقع ہے۔
موسمی صورتحال کے مطابق لاہور میں آج بارش کا کوئی امکان نہیں، جبکہ موسم گرم اور خشک رہنے کی پیش گوئی کی گئی ہے۔
دوسری جانب لاہور کی فضائی آلودگی بھی شہریوں کے لیے تشویش کا باعث بنی ہوئی ہے۔ عالمی فضائی آلودگی کی درجہ بندی میں لاہور ساتویں نمبر پر آگیا ہے۔
شہر کا ایئر کوالٹی انڈیکس (AQI) 151 ریکارڈ کیا گیا، جس کے باعث لاہور کی فضا کو غیر صحت بخش قرار دیا گیا ہے۔
ماہرین کے مطابق فضائی آلودگی کی موجودہ صورتحال میں شہریوں کو غیر ضروری طور پر آلودہ فضا میں زیادہ دیر رہنے سے گریز کرنا چاہیے، بالخصوص حساس افراد احتیاطی تدابیر اختیار کریں۔