(رانا اظہر)شہر میں تیز آندھی اور بارش کے باعث سائن بورڈز گرنے سے دو افراد زخمی ہوگئے,زخمیوں کو ریسکیو 1122 نے ہسپتال منتقل کیا ۔

تفصیلات کے مطابق یاد گار فلائی اوور کا ٹریفک سائن بورڈ تیز آندھی کا زوربرداشت نہ کرسکا اور گر گیا ،خوش قسمتی سے کوئی جانی و مالی نقصان نہ ہوا ، تاہم پیر مکی سے یادگار طرف جاتے ہوئے سڑک پر لگا سائن بورڈ گرنے سے دو افراد زخمی ہوگئے،زخمیوں کو ریسکیو 1122 نے ہسپتال منتقل کیا ۔سائن بورڈ کی زد میں آنے والے ایک زخمی کی حالت تشویش ناک بتائی جاتی ہے،زخمی ہونے والے افراد موٹر سائیکلوں پر سفر کر رہے تھے، سائن بورڈ گرنے سے موٹر سائیکلوں کو بھی شدید نقصان پہنچا ہے۔ 

دوسری جانب پنجاب،سندھ،خیبرپختونخوا اور بلوچستان کےکئی شہروں میں بارش نےموسم سہانا بنادیا،محکمہ موسمیات نےمزید بارش کی پیشگوئی کردی،کراچی میں موسم گرم اور خشک رہےگا۔تیزہواؤں کے ساتھ بارش نے موسم خوشگوار بنادیا، پنجاب،سندھ،خیبرپختونخوا اور بلوچستان کےکئی شہروں میں بادل برس پڑے۔
سب سے زیادہ بارش نورپورتھل میں 26 ملی میٹرریکارڈ کی گئی، لاہور میں بارش اورہواؤں نےموسم ٹھنڈا ٹھار کردیا، قصور، لیہ، ننکانہ صاحب، حافظ آباد، خانپور، بہاولپور، بہاولنگر، جوہر آباد، بھکر، رحیم یار خان میں بھی رم جھم ہوئی،ادھر لاڑکانہ، کندھکوٹ اور دادو میں بھی بارش نے موسم کی رت ہی بدل دی۔
بلوچستان کےعلاقوں ژوب، بارکھان اورڈیرہ بگٹی میں بارش نے رنگ جمادیا، پاراچنار اور بنوں میں بھی بارش ہوئی،محکمہ موسمیات کے مطابق آئندہ چوبیس گھنٹوں کے دوران اسلام آباد، شمال مشرقی پنجاب، کشمیر اور گلگت بلتستان میں مطلع ابر آلود رہنے اورگرج چمک کے ساتھ ہلکی بارش کا امکان ہے،جبکہ کراچی میں موسم گرم اور خشک رہنےکی پیشگوئی کی گئی ہے۔