سوشل میڈیا پر چاچا کرکٹ کے  انتقال کی افواہیں،حقیقت کیا ہے؟جانیے

سوشل میڈیا پر چاچا کرکٹ کے  انتقال کی افواہیں،حقیقت کیا ہے؟جانیے

(ایس علی)سوشل میڈیا پر چاچا کرکٹ کے انتقال کی خبر غلط ثابت ہوئی ،مرنے والا شخص پی سی بی کے سابق ہیڈ گراﺅنڈ مین حاجی بشیر ہیں، شکل میں مماثلت کی وجہ سے لوگ انہیں چاچا کرکٹ سمجھ بیٹھے۔

تفصیلات کے مطابق سوشل میڈیا پر چاچا کرکٹ کے انتقال کی بے بنیاد خبریں گردش کرنے پر چاچا کرکٹ خود میدان میں آگئے اور اپنا ویڈیو پیغام جاری کردیا، اور تمام افواہوں کو رد کردیا۔

پی سی بی کے سابق ہیڈ گراﺅنڈ مین حاجی بشیر حرکت قلب بند ہونے سے انتقال کرگئے،حاجی بشیر نے 50 سال سے زائد پاکستان کرکٹ بورڈ میں خدمات انجام دیں ،ملک میں زیادہ تر ٹیسٹ سینٹرز کی پچز حاجی بشیر نے بنائیں،پی سی بی سے ریٹائرمنٹ کے بعد حاجی بشیر لاہور قلندرز کے ہائی پرفارمنس سینٹر میں خدمات انجام دے رہے تھے،ماجد خان، حنیف محمد، عمران خان، جاوید میانداد، انضمام الحق ،ویوین رچرڈز سمیت دنیا کے ٹاپ سٹارز حاجی بشیر کی بنائی وکٹوں پر کرکٹ کھیلے۔

سابق قومی فاسٹ باﺅلر شعیب اختر نے سماجی رابطے کی ویب سائٹ ٹوئٹ پر اپنے ٹوئٹ میں کہاہے کہ کرکٹ گراﺅنڈ کے سینئرگراﺅنڈ مین حاجی بشیر دل کا دورہ پڑنے سے انتقال کرگئے،انہوں نے پی سی بی اور دنیا کرکٹ کی50 سال سے زائد خدمت کی،تمام عالمی کرکٹرز ان سے اچھی طرح واقف ہیں۔

پاکستان کرکٹ بورڈ (پی سی بی)نے سابق ہیڈ گراﺅنڈ مین حاجی بشیر احمد کے انتقال پر اظہار افسوس کیا اورکہاہے کہ اللہ تعالیٰ مرحوم کے اہلخانہ اور دوستوں کو یہ دکھ برداشت کرنے کی ہمت دے۔