ویب ڈیسک:  بھارت میں ترک ڈراموں کی بڑھتی ہوئی مقبولیت کے باوجود اسٹریمنگ پلیٹ فارمز نے خاموشی سے ترک مواد ہٹانا شروع کر دیا ہے۔ اس اقدام کی بنیادی وجہ حالیہ پاک-بھارت کشیدگی کے دوران ترکیہ کی پاکستان سے سیاسی قربت بتائی جا رہی ہے جو بھارت کے لیے باعثِ تشویش بن چکی ہے۔

میڈیا رپورٹس کے مطابق بھارتی اسٹریمنگ پلیٹ فارم Zee5 نے ترک ڈراموں کا مکمل کیٹلاگ بغیر کسی سرکاری اعلان کے ہٹا دیا ہے جبکہ دیگر او ٹی ٹی پلیٹ فارمز نے بھی ترک مواد پر نظرثانی شروع کر دی ہے اور نئے معاہدے عارضی طور پر روک دیے گئے ہیں۔

گزشتہ چند برسوں میں 'ارطغرل غازی'، 'فریحہ' اور 'ماسوم' جیسے ترک ڈراموں نے بھارتی ناظرین کے دل جیتے مگر حالیہ سیاسی تناؤ کے بعد یہ ڈرامے اچانک غائب ہو گئے۔ Zee5 کے مطابق ترک مواد کامیاب تو تھا لیکن بھارتی عوامی جذبات اور ممکنہ ردعمل کو مدنظر رکھتے ہوئے یہ فیصلہ کیا گیا۔

اگرچہ MX Player اور Amazon Prime نے تاحال ترک مواد ہٹایا نہیں مگر ترک پروڈکشن ہاؤسز کے ساتھ نئے معاہدے فی الحال ملتوی کر دیے گئے ہیں۔ 'گولڈن بوائے'، 'لو اِن دی ایئر' اور 'اینڈلیس لوو' جیسے شوز ابھی دستیاب ہیں، مگر ان کا مستقبل غیر یقینی ہے۔

ترک ڈرامے نشر کرنے والے یوٹیوب چینلز بھی نشانے پر آ گئے ہیں۔ Live Pakistan نامی چینل، جو 'ارطغرل' نشر کرتا تھا، بھارت میں دستیاب نہیں رہا۔ چینل کے مطابق انہیں حالیہ دنوں میں متعدد 'ٹیک ڈاؤن' نوٹس موصول ہوئے ہیں، جو ایک منظم کارروائی کا حصہ معلوم ہوتی ہے۔

فیڈریشن آف ویسٹرن انڈیا سینی ایمپلائز (FWICE) اور آل انڈین سینی ورکرز ایسوسی ایشن (AICWA) نے بھی ترک مواد کے خلاف سخت موقف اختیار کیا ہے۔ ان اداروں نے بھارتی فلم انڈسٹری سے اپیل کی ہے کہ وہ ترکیہ اور آذربائیجان سے مالی معاونت یافتہ منصوبوں سے دور رہیں۔

یاد رہے کہ اس سے قبل بھارت نے پاکستانی مواد پر بھی مکمل پابندی عائد کر رکھی ہے۔ ایک سرکاری ایڈوائزری کے ذریعے تمام پلیٹ فارمز کو ہدایت دی گئی تھی کہ پاکستان سے آنے والا ہر قسم کا مواد فوری ہٹایا جائے۔