راو دلشاد: وزیر اعلیٰ پنجاب مریم نواز شریف نے رمضان المبارک کے دوران کاروباری اوقات کار بڑھانے کی منظوری دے دی۔ 

مشیر وزیر اعلیٰ پنجاب زیشان ملک نے نوٹیفکیشن اپنے ایکس اکاؤنٹ پر شیئر کیا، جبکہ لیبر اینڈ ہیومن ریسورس ڈیپارٹمنٹ نے باقاعدہ نوٹیفکیشن جاری کر دیا ہے۔ پنجاب حکومت کے اعلامیے کے مطابق رمضان المبارک میں صوبے بھر کے کاروباری مراکز کو اوقات کار کی پابندی سے استثنیٰ دے دیا گیا ہے۔

نوٹیفکیشن کے تحت دکانیں، شاپنگ مالز، سپر مارکیٹس، چین اسٹورز اور ریسٹورنٹس کو خصوصی رعایت حاصل ہوگی۔ یہ اجازت پنجاب شاپس اینڈ اسٹیبلشمنٹس آرڈیننس 1969 کے تحت دی گئی ہے۔

صوبے بھر کے متعلقہ اداروں اور انتظامیہ کو نوٹیفکیشن پر عملدرآمد کی ہدایات جاری کر دی گئی ہیں، جبکہ ڈی جی لیبر ویلفیئر اور ڈپٹی کمشنرز کو احکامات پر عمل یقینی بنانے کی ذمہ داری سونپی گئی ہے۔ محکمہ اطلاعات کو فیصلے کی میڈیا میں تشہیر اور چیمبرز آف کامرس و صنعت کے صدور کو بھی آگاہ کر دیا گیا ہے۔