اسرار خان : شہر لاہور میں گن پوائنٹ پر کار، موٹر سائیکل اور کمرشل گاڑیاں چھیننے کا سلسلہ جاری ہے۔
تفصیلات کے مطابق شہر لاہور کے مختلف علاقوں میں گزشتہ 8 ماہ کے دوران 10 کاریں، 1115 موٹر سائیکلیں، 40 کمرشل گاڑیاں چھینی گئیں۔ کار چھیننے کی وارداتوں میں صدر ڈویژن 5 مقدمات کے ساتھ سر فہرست رہا، جبکہ ماڈل ٹاؤن ڈویژن 4 وارداتوں کے ساتھ دوسرے نمبر پر رہا۔ اس کے علاوہ 8 ماہ کے دوران کینٹ ڈویژن میں کار چھیننے کی ایک واردات ہوئی۔
دوسری جانب کمرشل گاڑیاں چھیننے کی 19 وارداتوں کے ساتھ صدر ڈویژن سر فہرست رہا، ماڈل ٹاؤن ڈویژن 10 مقدمات کے ساتھ دوسرے، کینٹ ڈویژن 5 مقدمات کے ساتھ تیسرے نمبر پر رہا، سٹی ڈویژن میں 4، سول لائنز اور اقبال ٹاؤن ڈویژن میں ایک، ایک کمرشل گاڑی چھینی گئی۔
موٹر سائیکل چھیننے کی وارداتوں میں صدر ڈویژن 296 وارداتوں کے ساتھ سر فہرست رہا۔ ماڈل ٹاؤن ڈویژن 240 مقدمات کے ساتھ دوسرے نمبر پر رہا۔ سٹی ڈویژن موٹر سائیکل چھیننے کے 213 مقدمات کے ساتھ تیسرے نمبر پر رہا۔
کینٹ ڈویژن میں 189، اقبال ٹاؤن ڈویژن میں 107 موٹر سائیکلیں چھینی گئیں، جبکہ سول لائنز ڈویژن میں 8 ماہ کے دوران 70 موٹر سائیکلیں گن پوائنٹ پر چھینی گئیں۔